ఏపీలో కోవిడ్–19 కేసులు పెరుగుతున్నాయి: 66 యాక్టివ్ కేసులు, అల్లూరి సీతారామరాజు జిల్లాలో కొత్త కేసు

ఆంధ్రప్రదేశ్‌లో కోవిడ్–19 కేసులు క్రమంగా పెరుగుతున్నాయి. రాష్ట్రంలో ప్రస్తుతం 66 యాక్టివ్ కేసులు ఉన్నాయి. తాజాగా అల్లూరి సీతారామరాజు జిల్లాలో మరో కొత్త కేసు నమోదు అయింది.

ఇప్పటి వరకు మొత్తం 722 మందికి కోవిడ్ పరీక్షలు నిర్వహించారు. పాజిటివ్ వచ్చిన వారిలో నలుగురు మృతి చెందగా, 9 మంది ఆసుపత్రుల్లో చికిత్స పొందుతున్నారు. 10 మంది హోమ్ ఐసోలేషన్‌లో ఉన్నారు. ఇప్పటివరకు 46 మంది కోలుకుని ఆసుపత్రుల నుంచి డిశ్చార్జ్ అయ్యారు.

కేసుల పెరుగుదల నేపథ్యంలో ఏపీ వైద్య ఆరోగ్య శాఖ అప్రమత్తమైంది. అన్ని ప్రభుత్వ ఆసుపత్రులు, ప్రాథమిక ఆరోగ్య కేంద్రాల్లో ఐసోలేషన్ వార్డులు ఏర్పాటు చేయాలని, కోవిడ్ పరీక్షలు నిర్వహించాలని ఆదేశాలు జారీ చేసింది. అనుమానితులకు తప్పనిసరిగా పరీక్షలు చేయాలని, బాధితులకు సకాలంలో చికిత్స అందించాలని అధికారులను ఆదేశించింది.

వైద్య నిపుణులు మాట్లాడుతూ, ప్రస్తుతం కోవిడ్ కేసులు సీజనల్‌గా వస్తున్నాయని, గతంలో మాదిరిగా విస్తృత స్థాయిలో వ్యాపించే అవకాశం లేదని తెలిపారు. డెంగ్యూ, మలేరియా మాదిరిగానే ఇది సీజన్ మారినప్పుడు కనిపిస్తుందని, జాగ్రత్తలు పాటిస్తే నివారించవచ్చని చెప్పారు.