తాడేపల్లిలో అరణ్యరామం ప్రాజెక్టుకు భూమి పూజ చేసిన AP డిప్యూటీ CM పవన్ కళ్యాణ్

గుంటూరు జిల్లా తాడేపల్లిలో నిర్మించనున్న అరణ్యరామం ప్రాజెక్టుకు ఆంధ్రప్రదేశ్ ఉప ముఖ్యమంత్రి పవన్ కళ్యాణ్ ఇవాళ ఉదయం భూమి పూజ నిర్వహించారు. మంత్రులు నాదెండ్ల మనోహర్, కందుల దుర్గేష్, అటవీ శాఖ ఉన్నతాధికారులు ఈ కార్యక్రమంలో పాల్గొన్నారు.

ఈ ప్రాజెక్టు మంగళగిరి-తాడేపల్లి నగర పరిధిలోని బ్రహ్మానందపురం అటవీ ప్రాంతంలో నిర్మించనున్నారు. దాదాపు రూ. 27 కోట్ల వ్యయంతో ఈ కేంద్రాన్ని నిర్మించనున్నట్లు అధికారులు తెలిపారు. ఇందులో రాష్ట్రంలోని అడవులు, వన్యప్రాణులు, పర్యావరణ సమతుల్యతను పరిరక్షించడానికి అత్యాధునిక సాంకేతికతను ఉపయోగించనున్నారు.

ప్రాజెక్టు కింద అనేక కీలక విభాగాలు ఏర్పాటు చేస్తారు. మానవ-వన్యప్రాణుల సంఘర్షణ నివారణ విభాగం, ఫారెస్ట్ ఫైర్ కమాండ్ కంట్రోల్ సెంటర్, పులుల సంరక్షణ కోసం స్టేట్ టైగర్ మానిటరింగ్ సెంటర్ వంటివి ఉంటాయి. అలాగే పొరుగు రాష్ట్రాల నుంచి చిత్తూరు, పార్వతీపురం మన్యం జిల్లాలకు ఏనుగులు వచ్చే అవకాశం ఉన్నందున, ఎలిఫెంట్ మానిటరింగ్ విభాగం కూడా ఏర్పాటు చేస్తారు. దీని ద్వారా పంట నష్టాన్ని నివారించవచ్చని పవన్ కళ్యాణ్ తెలిపారు.

భూమి పూజ అనంతరం పవన్ కళ్యాణ్ అక్కడ మొక్కలు నాటారు. పర్యావరణ పరిరక్షణ ప్రతి ఒక్కరి బాధ్యత అని ఈ సందర్భంగా పిలుపునిచ్చారు.