ఏపీలో ఆహార భద్రత తనిఖీలు; 25 హోటళ్లు మూసివేత

ఆంధ్రప్రదేశ్‌లో ఆహార భద్రత అధికారులు హోటళ్లు, రెస్టారెంట్లపై ఆకస్మిక తనిఖీలు నిర్వహించారు. రాష్ట్రంలోని 28 జిల్లాల్లో ఈ తనిఖీలు జరిగాయి. నిబంధనలను తీవ్రంగా ఉల్లంఘించిన 25 హోటళ్లను అధికారులు మూసివేశారు.

మరో 45 హోటళ్లకు నోటీసులు జారీ చేశారు. 30 హోటళ్లపై కేసులు నమోదు చేశారు. తనిఖీల్లో గుర్తించిన లోపాలు, తీసుకున్న చర్యలతో కూడిన నివేదికను మంత్రి సత్యకుమార్‌కు అధికారులు సమర్పించారు.

వంటగదుల్లో అపరిశుభ్ర పరిస్థితులు, ఆహార నిల్వలో నిర్లక్ష్యం గుర్తించారు. కొన్ని హోటళ్లలో అనుమతి లేని కృత్రిమ రంగులు, రుచి పెంచే పదార్థాలు వాడినట్లు తేలింది. కొన్ని చోట్ల కృత్రిమ పన్నీర్ వినియోగాన్ని గుర్తించారు.

100 కిలోలకు పైగా వండిన ఆహారాన్ని ఫ్రీజర్లలో ఎక్కువ కాలం నిల్వ ఉంచారు. వాటిని స్వాధీనం చేసుకుని ధ్వంసం చేశారు. కొన్ని చోట్ల ఆహారాన్ని మూతలు, కవర్లు లేకుండా నిల్వ చేశారు. నిల్వ చేసిన ఆహారాన్ని తేదీల వారీగా మార్చే విధానం పాటించలేదని అధికారులు గుర్తించారు.