అగ్రిగోల్డ్ కేసులో మరిన్ని ఆస్తుల జప్తుకు ఏపీ హోమ్ శాఖ ఆదేశాలు

ఆంధ్రప్రదేశ్ ప్రభుత్వం అగ్రిగోల్డ్ కేసులో మరిన్ని ఆస్తుల జప్తుకు ఆదేశాలు జారీ చేసింది. డిపాజిటర్ల సొమ్ముతో బంధువుల పేరుతో కొనుగోలు చేసినట్టు విచారణలో తేలడంతో ఈ చర్య తీసుకున్నారు.

పోరంకి, పెనమలూరు ప్రాంతాల్లో వై. జయలక్ష్మి పేరిట 6.55 ఎకరాల భూమిని గుర్తించారు. ఈమె అగ్రిగోల్డ్ కంపెనీల జాయింట్ ఎండీ అవ్వ హేమ సుందర వరప్రసాద్‌కు అత్త. కర్ణాటకలోని సర్జాపూర్‌ హోబ్లీ, ముత్తనల్లూర్‌లో ఎన్. మమత పేరిట మరో 3.32 ఎకరాల భూమిని కూడా డిపాజిటర్ల సొమ్ముతో కొనుగోలు చేసినట్టు విచారణలో తేలింది.

ఈ ఆస్తులను జప్తు చేసేలా చర్యలు తీసుకోవాలని సీఐడీ డైరెక్టర్ జనరల్‌ను ప్రభుత్వం ఆదేశించింది. అగ్రిగోల్డ్ సంస్థ దాదాపు 6,380 కోట్ల రూపాయల డిపాజిట్లు సేకరించగా, 30 లక్షల మందికి పైగా డిపాజిటర్లు నష్టపోయారు. చాలా మంది ఆత్మహత్యలకు పాల్పడడంతో ఈ సమస్య పరిష్కారానికి ప్రభుత్వం ప్రత్యేక దృష్టి పెట్టింది.

ఈ కేసులో బాధితులకు న్యాయం చేయడానికి హోం మంత్రి అనిత, మంత్రులు అనగాని సత్యప్రసాద్, నాదెండ్ల మనోహర్, సత్య కుమార్‌లతో ఓ మంత్రివర్గ ఉపసంఘం (జీఓఎం) ఏర్పాటు చేశారు. ముఖ్యమంత్రి చంద్రబాబు నాయుడు ఈ ఉపసంఘాన్ని తరచుగా సమావేశమై ఆస్తుల జప్తు, వేలం వంటి చర్యలు వేగవంతం చేయాలని ఆదేశించారు.

రేపు జీఓఎం సమావేశం కానుండగా, ఆస్తుల వేలానికి సంబంధించిన తదుపరి కార్యాచరణపై నిర్ణయం తీసుకోనున్నారు. బాధిత డిపాజిటర్లకు ఎంత మొత్తంలో డబ్బు చెల్లించాలనే అంశంపై కూడా ఈ సమావేశంలో స్పష్టత రానుంది.