పవన్ కళ్యాణ్‌పై ట్రోలింగ్: రెచ్చగొట్టే ప్రయత్నానికి సైలెంట్‌గా సమాధానమిస్తోన్న ఏపీ ప్రభుత్వం

ఉప ముఖ్యమంత్రి పవన్ కళ్యాణ్‌పై సోషల్ మీడియాలో విమర్శలు, ట్రోలింగ్ పెరుగుతోంది. కొన్ని వ్యాఖ్యలు వ్యక్తిగత దూషణ స్థాయికి చేరుతున్నాయి. కానీ ఆంధ్రప్రదేశ్ ప్రభుత్వం మాత్రం స్పందించకుండా మౌనంగా ఉండటం గమనార్హంగా మారింది. ఇది వ్యూహాత్మక నిర్ణయమే అని రాజకీయ విశ్లేషకులు భావిస్తున్నారు.

ఇటీవల ఒక కార్యక్రమంలో పవన్ కళ్యాణ్‌పై అభ్యంతరకర వ్యాఖ్యలు చేసిన వ్యక్తి తాను ఆయన అభిమానినే అని చెప్పడం చర్చనీయాంశంగా మారింది. ఇది చూసిన జనసేన, కూటమి కార్యకర్తలు ఆగ్రహం వ్యక్తం చేస్తూ, బాధ్యులపై కేసు నమోదు చేసి అరెస్ట్ చేయాలని డిమాండ్ చేస్తున్నారు. అయితే ప్రభుత్వం ఎవరినీ అరెస్ట్ చేయడం లేదు.

గతంలో కొన్ని అరెస్ట్‌లు జరిగినప్పుడు ప్రతిపక్షం వాటిని బాధ్యతా రాహిత్యంగా ప్రచారం చేసి రాజకీయ లాభం పొందిందనే విశ్లేషణ నేపథ్యంలో ప్రభుత్వం ఈ మౌన వ్యూహం అనుసరిస్తోంది. మాజీ మంత్రి అమర్నాథ్ ఇటీవల హోంమంత్రిపై చేసిన వ్యాఖ్యలు, ఆ తర్వాత విజయవాడలో ఊరేగింపు ఇందుకు ఉదాహరణ. ఆయనపై మహిళా కమిషన్ నోటీసులు జారీ చేసినా, ఆయన దాన్ని పెద్ద రాజకీయ చర్యగా మార్చుకున్నారు. ఇలాంటి పరిస్థితి మళ్ళీ రాకుండా ప్రభుత్వం జాగ్రత్త పడుతోంది.

పవన్ కళ్యాణ్ సైతం తాజా పార్టీ సమావేశంలో ఈ విమర్శల్ని తేలిగ్గా తీసుకుంటున్నట్టు ప్రస్తావించారు. తాను రాటు తేలిపోయానని, ఇప్పుడు ఏ విమర్శ వచ్చినా పట్టించుకోనని చెప్పినట్టు సమాచారం.

ఈ మౌనం వల్ల సొంత కార్యకర్తల్లో కొంత అసహనం వ్యక్తమవుతోంది. అయినా ప్రభుత్వం మాత్రం ప్రతిపక్షం ఎర వేస్తున్న ట్రాప్‌లో చిక్కకుండా వ్యూహాత్మకంగా ముందుకు సాగుతోందని విశ్లేషకులు అంచనా వేస్తున్నారు. రెచ్చగొట్టడమే లక్ష్యంగా ప్రతిపక్షం చేస్తున్న ఈ సోషల్ మీడియా దూషణలకు ప్రభుత్వం స్పందించకపోవడం సరైన వ్యూహమే అని వారు భావిస్తున్నారు. ఇక ముందు ప్రతిపక్షం మరింత దూకుడు పెంచుతుందా లేక ప్రభుత్వం ఆ పని చేస్తుందా అన్నది వేచి చూడాలి.