గంజాయి వినియోగాన్ని గుర్తించే రాపిడ్ టెస్టు అందుబాటులోకి తెచ్చిన ఏపీ పోలీసులు

ఆంధ్రప్రదేశ్ పోలీసులు గంజాయి వినియోగాన్ని గుర్తించేందుకు రాపిడ్ టెస్ట్ విధానాన్ని ప్రవేశపెట్టారు. అడ్డతీగల పోలీస్ స్టేషన్ సీఐ గజేంద్ర కుమార్ ఈ వివరాలు వెల్లడించారు.

ఈ పరీక్ష ద్వారా గత ఆరు నెలల్లో ఎవరైనా గంజాయి తాగి ఉంటే గుర్తించవచ్చు. యూరిన్ నమూనా సేకరించి, ప్రత్యేక టెస్ట్ కిట్లో రెండు చుక్కలు వేస్తే సి (C) లైన్ దగ్గర రెడ్ మార్క్ రావడం పాజిటివ్ ఫలితంగా పరిగణించబడుతుంది.

పాజిటివ్ వస్తే ఆ వ్యక్తిపై NDPS చట్టంలోని సెక్షన్ 27B కింద కేసు నమోదు చేస్తారు. కొత్తగా గంజాయి అలవాటు పడిన వారికి కౌన్సిలింగ్ ఇస్తారు. గంజాయి విక్రయించిన, రవాణా చేసిన వారిపై కఠిన చర్యలు తీసుకుంటామని సీఐ హెచ్చరించారు.

ఇప్పటికే గంజాయి కేసుల్లో ఉన్న వ్యక్తుల చరిత్ర కూడా సేకరించి, తదుపరి చర్యలు తీసుకుంటామని ఆయన తెలిపారు.