AP SIPB 20వ సమావేశం: 25 ప్రాజెక్టులకు ఆమోదం, రూ.2.08 లక్షల కోట్ల పెట్టుబడి

ముఖ్యమంత్రి చంద్రబాబు నాయుడు అధ్యక్షతన జరిగిన 20వ రాష్ట్ర స్థాయి పెట్టుబడుల ప్రోత్సాహక బోర్డు (SIPB) సమావేశంలో రూ.2.08 లక్షల కోట్ల విలువైన 25 ప్రాజెక్టులకు గ్రీన్ సిగ్నల్ లభించింది. ఈ ప్రాజెక్టుల ద్వారా 21,627 మందికి ప్రత్యక్ష ఉద్యోగాలు కల్పించనున్నారు.

భారీ పెట్టుబడి ప్రతిపాదనల్లో అనకాపల్లిలో రెన్యూ ఏపీ గ్రీన్ డేటా సెంటర్‌కు రూ.85,200 కోట్లు, విశాఖలో డేటా సెంటర్ హోల్డింగ్స్ ఇండియాకు రూ.58,743 కోట్లు, ఏఎం ఇంటెలిజెన్స్ ల్యాబ్స్‌కు రూ.31,387 కోట్లు ఉన్నాయి. గ్రీన్ అమోనియా, లిథియం బ్యాటరీలు, రోబోటిక్స్ వంటి భవిష్యత్ రంగాల్లో పెట్టుబడులు ఆకర్షించేలా ప్రత్యేక చర్యలు తీసుకోవాలని సీఎం అధికారులకు సూచించారు.

పారిశ్రామిక ప్రోత్సాహకాలను ఎస్క్రో ఖాతాల ద్వారా అందించడంతో పాటు గ్రామీణ ప్రాంతాలకు పరిశ్రమలను విస్తరించాలని సీఎం ఆదేశించారు. డేటా సెంటర్లపై ఉన్న అపోహలు తొలగించాలని, ఉత్తరాంధ్రలో అన్ని డేటా సెంటర్లకు కలిపి 3.5–5 టీఎంసీల నీరు సరిపోతుందని తెలిపారు. మూలపేట పోర్ట్ నిర్మాణాన్ని డిసెంబర్ నాటికి పూర్తి చేయాలని స్పష్టం చేశారు.

“రాష్ట్రంలో ఏర్పాటవుతున్న రక్షణ రంగ ప్రాజెక్టులు జాతికి గర్వకారణం” అని సీఎం అభిప్రాయపడ్డారు. రాయలసీమ ఉద్యాన ఉత్పత్తులను అంతర్జాతీయ మార్కెట్లకు చేర్చేందుకు రోడ్డు, రైలు, పోర్టు కనెక్టివిటీ మెరుగుపరచాలని సూచించారు. ఎంఎస్ఎంఈ పార్కులను సెప్టెంబర్ నాటికి పూర్తి చేయాలని, ‘వన్ ఫ్యామిలీ వన్ ఎంట్రప్రెన్యూర్’ కార్యక్రమాన్ని పెద్ద ఎత్తున చేపట్టాలని ఆదేశాలు జారీ చేశారు.

ఇప్పటివరకు జరిగిన 20 SIPB సమావేశాల్లో మొత్తం 363 ప్రతిపాదనలకు రూ.13.78 లక్షల కోట్ల పెట్టుబడులు ఆమోదం పొందగా, దాదాపు 10.86 లక్షల మందికి ఉపాధి లభించనుందని అధికారులు సీఎంకు నివేదించారు.