ఏపీఎస్ఆర్టీసీ ఉద్యోగ సంఘాల JAC ఉద్యమానికి సిద్ధం, ఈ నెల 28న కీలక సమావేశం

ఏపీఎస్ఆర్టీసీ ఉద్యోగ సంఘాల జాయింట్ యాక్షన్ కమిటీ (JAC) ప్రభుత్వంపై ఒత్తిడి తీసుకురావడానికి పోరాటానికి సిద్ధమవుతోంది.

ఈ నెల 28న రాష్ట్ర స్థాయి సమావేశం నిర్వహించనున్నట్టు JAC రాష్ట్ర కన్వీనర్లు శ్రీనివాసరావు పలిశెట్టి, దామోదర్ రావు ప్రకటించారు. ఉద్యోగుల సమస్యలపై ఏపీ ప్రభుత్వం నుంచి స్పష్టమైన హామీ రాకపోవడంతో రెండో దశ ఉద్యమానికి సిద్ధమవుతున్నట్టు వారు తెలిపారు.

ఆర్టీసీలో ప్రైవేట్ విద్యుత్ బస్సులను ప్రవేశపెట్టే ప్రతిపాదనలకు తాము పూర్తిగా వ్యతిరేకమని స్పష్టం చేశారు. సంస్థను ప్రైవేటీకరించకుండా కాపాడాలని, ఉద్యోగుల న్యాయమైన డిమాండ్లను పరిష్కరించాలని కోరారు. ఇప్పటికే 15 ప్రధాన డిమాండ్లతో ఆందోళనకు దిగిన ఉద్యోగులు రెండు రోజుల పాటు ఎర్ర బ్యాడ్జీలు ధరించి నిరసన వ్యక్తం చేశారు.

28న జరిగే సమావేశంలో ఉద్యమాన్ని మరింత ఉదృతం చేసే భవిష్యత్ కార్యాచరణ ప్రకటించనున్నారు. ఆర్టీసీ డిపోల్లోని విలువైన ఆస్తులను ప్రైవేట్ పరం చేసే ప్రయత్నాలను విరమించుకోవాలని JAC డిమాండ్ చేసింది.