ఉమ్మడి పశ్చిమగోదావరి జిల్లాలో ఆక్వా రైతులు బంద్; ఫీడ్ ధర తగ్గింపు డిమాండ్

ఉమ్మడి పశ్చిమగోదావరి జిల్లా వ్యాప్తంగా ఆక్వా రైతులు బంద్ చేపట్టారు. రొయ్య ఫీడ్ ధరలను కేజీకి రూ.4 తగ్గించాలని, రొయ్య రేట్లు పెంచాలని వారు డిమాండ్ చేస్తున్నారు.

ప్రభుత్వం సూచించిన మేరకు ఫీడ్ ధరలు కేజీకి రూ.4 తగ్గించాల్సి ఉండగా, కంపెనీలు కేవలం రూ.2 మాత్రమే తగ్గించాయి. దీంతో ఆగ్రహించిన రైతులు నిరసనలు చేపట్టారు. అలాగే ఫీడ్ కంపెనీల ఏకపక్ష నిర్ణయాలను వ్యతిరేకిస్తూ పలు ప్రాంతాల్లో ర్యాలీలు నిర్వహిస్తున్నారు.

ఫీడ్ డీలర్లు కూడా రైతులకు సంఘీభావం తెలుపుతూ షాపులు మూసివేశారు. మేత ధరల పెంపు వల్ల రైతుల నుంచి బకాయిలు పెరుగుతున్నాయని డీలర్లు వాపోతున్నారు.

ఆక్వా రైతు సంఘం రాష్ట్ర అధ్యక్షుడు గాంధీ భగవాన్ రాజు మాట్లాడుతూ, ఫీడ్ రేటు మరో రూ.2 తగ్గించాలని, రొయ్య రేటు పెంచాలని డిమాండ్ చేశారు. రైతుల సమస్యను ప్రభుత్వం అర్థం చేసుకొని చర్యలు తీసుకోవాలని విజ్ఞప్తి చేశారు.

ఈ బంద్ ఆంబేడ్కర్ కోనసీమ, ఏలూరు తదితర జిల్లాల్లో కూడా కొనసాగుతోంది. రైతులు మెడిసిన్ షాపులు కూడా మూసివేసి నిరసన వ్యక్తం చేస్తున్నారు.