ఆషాఢ అమావాస్య: చుక్కల అమావాస్యగా తెలంగాణలో దీప పూజ ఆచారాలు

ఆషాఢ అమావాస్య రోజున తెలంగాణలో మహిళలు పాటించే ప్రత్యేక ఆచారాలకు చుక్కల అమావాస్య, పొలాల అమావాస్య, దీప అమావాస్య అని పలు పేర్లు ఉన్నాయి. ఈ రోజు దీపాన్ని అమ్మవారి ప్రతీకగా భావించి పూజిస్తారు.

ఈ సందర్భంగా మహిళలు ఎర్ర మట్టిని సేకరించి దీప స్తంభం తయారు చేస్తారు. ఇంట్లో ప్రత్యేక వేదికపై ఈ మట్టి స్తంభాన్ని ఉంచి పక్కన రెండు దీపాలు వెలిగిస్తారు. బియ్యం పిండి, పంచదార లేదా బెల్లం, ఆవుపాలతో చలిమిడి సిద్ధం చేసి దీపానికి నివేదనగా అర్పిస్తారు.

పెద్ద మహిళలు చిన్నారులను చేరదీసి ఒక గ్రామంలో ఒక దంపతుల కుటుంబంలో పిల్లలు పుడుతూ పోతూ ఉన్న కథ చెబుతారు. ఉత్తరేణి ఆకును ఐదు ముడులు వేసిన ఐదు వరుసల దారంలో ఉంచి దీపస్తంభంపై ఉంచి పూజించి, ఆ తోరాన్ని పిల్లల చేతికి కడతారు. ఉత్తరేణి పుల్లతో పళ్ళు తోముకుంటే శ్రావణ మాసం అంతా దంత వ్యాధులు రావని, చిగుళ్ళకు బలం చేకూరుతుందని బోధిస్తారు.

పూజ అనంతరం దీపస్తంభాన్ని చిదిమి ఆ మట్టిని పొలాల్లో విరజిమ్మినట్లయితే పంటలు బాగా పండుతాయని రైతుల విశ్వాసం. ఈ దీప పూజ ఆచారంతో ఆషాఢ మాసం ముగిసి శ్రావణ మాసానికి స్వాగతం పలుకుతారు.