పంట పురుగుల నివారణకు లింగాకర్షక బుట్టల వినియోగం: శాస్త్రవేత్త వివరణ

పంట పురుగులను ముందుగా గుర్తించడానికి లింగాకర్షక బుట్టలు ఉపయోగపడతాయని వ్యవసాయ శాస్త్రవేత్తలు తెలిపారు. శ్రీకాకుళం జిల్లా ఆముదాలవలస కృషి విజ్ఞాన కేంద్రం శాస్త్రవేత్త అనూష ఈ వివరాలు అందించారు. పురుగుల ఉదృతి పెరిగిన తర్వాత పెద్ద ఎత్తున మందులు పిచికారి చేయడం వల్ల ప్రయోజనం తక్కువ. పురుగుల ఉనికిని ముందుగా గుర్తించడమే ముఖ్యమని ఆమె తెలిపారు.

ఈ బుట్టలు కాండం తొలిచే పురుగులు, కాయ తొలిచే పురుగులు, ఆకులు తినే పురుగుల నివారణకు పనిచేస్తాయి. ఇవి మగ పురుగులను ఆకర్షించి చంపుతాయి. దీనివల్ల ఆడ పురుగుల గుడ్ల ఉత్పత్తి తగ్గుతుంది. రసాయన పురుగు మందుల వాడకం కూడా తగ్గుతుంది.

వరి, మొక్కజొన్న, వంగ వంటి పంటలకు వేర్వేరు ఎరలు అందుబాటులో ఉన్నాయి. ఎకరానికి 4 నుంచి 8 బుట్టలు పెట్టుకోవచ్చు. పండు ఈగల నివారణకు ఎకరానికి 20 నుంచి 30 బుట్టలు అవసరం. కొబ్బరి తోటల్లో కొమ్ము పురుగు, ఎర్ర ముక్కు పురుగు నివారణకు బకెట్ ఎరలు వాడాలి. బకెట్లో సబ్బు నీళ్లు లేదా పురుగు మందు కలిపిన నీళ్లు ఉంచాలి. వీటిని చెట్టు కాండానికి కట్టకుండా తోటలో కర్రకు కట్టాలి.

ఒక ట్రాప్ ధర ₹100 నుంచి ₹150 వరకు ఉంటుంది. ఎర ధర ₹25 నుంచి ₹50 వరకు ఉంటుంది. ఎకరానికి నాలుగు బుట్టలకు సుమారు ₹400 నుంచి ₹500 ఖర్చవుతుంది. ఈ ఖర్చుతో పురుగు మందుల పిచికారిని చాలావరకు తగ్గించవచ్చు.

పంటను బట్టి ఎరలను 30 నుంచి 45 రోజులకు మార్చాలి. కొబ్బరి తోటల ఎరలను ఆరు నెలలకు మార్చాలి. ఈ ట్రాప్లు జిల్లా కేంద్రాల్లో అందుబాటులో ఉన్నాయి. వివరాల కోసం KVK ఆముదాలవలస సస్యరక్షణ విభాగాన్ని సంప్రదించవచ్చు.