అస్సాం వరదలు: ధన్సిరి నది ఉగ్రరూపం, 14,000 మంది నిరాశ్రయులు

అస్సాంలోని జోర్హాట్ జిల్లాలో ధన్సిరి నది ఉగ్రరూపం దాల్చడంతో భారీ వరద ముంచెత్తింది. 34 గ్రామాలు నీట మునగడంతో దాదాపు 1.66 లక్షల మంది ప్రభావితమయ్యారు. జిల్లా యంత్రాంగం 39 సహాయ శిబిరాలు ఏర్పాటు చేయగా, వాటిలో సుమారు 9,700 మంది తలదాచుకుంటున్నారు. భారీ వర్షాల కారణంగా 18,000 పశువులు నష్టపోగా, 1,700కు పైగా పశువులు కొట్టుకుపోయాయి. ఇండ్లు, పంట పొలాలు దెబ్బతిన్నాయి. స్థానిక నివాసి ఒకరు మాట్లాడుతూ, ‘కేంద్రమంత్రులు శివరాజ్ సింగ్ చౌహాన్, కిరణ్ రిజిజు మా గ్రామాన్ని సందర్శించి, దెబ్బతిన్న ఇండ్లు, పంటలకు పరిహారం ఇప్పిస్తామని హామీ ఇచ్చారు. కానీ 40 రోజులు గడిచినా ఎలాంటి సాయం అందలేదు’ అని ఆవేదన వ్యక్తం చేశారు. కాగా, వరద పరిస్థితి ఇప్పుడు అదుపులోకి వచ్చిందని, నది నీటిమట్టం తగ్గుముఖం పడుతోందని అధికారులు తెలిపారు. కేంద్ర, రాష్ట్ర ప్రభుత్వాల సహకారంతో సహాయక చర్యలు, వైద్య సేవలు కొనసాగుతున్నాయి. ప్రజారోగ్యంపై ప్రత్యేక శ్రద్ధ పెడుతున్నామని వైద్యశాఖ అధికారులు పేర్కొన్నారు.