అస్సాం వరద విధ్వంసం: నాగాలాండ్ కొండచరియల మట్టితో మునిగిన గ్రామాలు, పంటలు, వ్యాపారాలు నాశనం

అస్సాంలోని శివసాగర్, చరాయిదేవ్ జిల్లాల్లో భారీ వరదలు విధ్వంసం సృష్టించాయి. నాగాలాండ్‌లో కురిసిన భారీ వర్షాలు, కొండచరియల విరిగిపడటంతో భారీ మొత్తంలో మట్టి, శిథిలాలు నీటితో పాటు ప్రవాహంగా మారి సోనారీ, నాజిరా, మేరువర్, భూవర్ తదితర గ్రామాల్లోకి దూసుకొచ్చాయి. కేవలం 15 నుంచి 30 నిమిషాల్లోనే చాలా ఇళ్లలోకి నీరు, మట్టి చేరి పూర్తిగా నిండిపోయాయని స్థానికులు చెబుతున్నారు.

వరద నీరు క్రమంగా తగ్గుముఖం పడుతుండటంతో ఇప్పటివరకు అనేక మృతదేహాలు బయటపడ్డాయి. ఎంత మంది చనిపోయారనే విషయంపై అధికారిక లెక్కలు రాలేదు. పశువులు, ఇతర జంతువులు కూడా మట్టిలో కూరుకుపోయి చనిపోయాయి. ఈ వరదతో పంటలు నాశనం కావడంతో రైతులు తీవ్ర నష్టపోయారు. చిన్న వ్యాపారులు, దుకాణదారులు కూడా పూర్తిగా నష్టపోయారు. "ఈ వరద మా వ్యాపారం, ఆశలన్నీ కొట్టుకుపోయాయి. మేము మళ్లీ లేవడం సాధ్యం కాదేమో" అని ఓ వ్యాపారి వాపోయారు.

ప్రభుత్వం ప్రకటించిన ప్రాథమిక సహాయం అందుతోంది, అయితే వ్యాపార వర్గాలను ఆదుకునేందుకు ప్రత్యేక ప్యాకేజీ ప్రకటించాలని స్థానికులు కోరుతున్నారు. "అస్సాం ప్రభుత్వం, ముఖ్యమంత్రి హేమంత బిశ్వ శర్మ వ్యాపార సంఘాలకు తక్షణ సాయం అందించాలని విజ్ఞప్తి చేస్తున్నాం" అని ఒక స్థానిక ప్రతినిధి చెప్పారు. నీరు పూర్తిగా తగ్గిన తర్వాత పూడిక మట్టి, శిథిలాలు తొలగించడంలో అతిపెద్ద సవాలుగా మారింది. చాలా చోట్ల చిక్కటి మట్టి కారణంగా సహాయక చర్యలు కూడా ఆలస్యం అవుతున్నాయి. ముందు వర్షాకాలం మరింత ముప్పు తీసుకురావచ్చని అంచనా వేస్తున్నారు.