అస్సాం, అరుణాచల్‌లో వరదలు: 100 కి పైగా గ్రామాలు ముంపు, రైల్వే బ్రిడ్జి కూలిపోయాయి

అస్సాంలో భారీ వర్షాల కారణంగా వరదలు తీవ్రమయ్యాయి. 100 కి పైగా గ్రామాలు ముంపునకు గురవగా, పంటలు, ఇళ్లు, ఇతర వస్తువులు నీటిలో మునిగిపోయాయి. పశువులు కూడా వరదలో కొట్టుకుపోయి ప్రాణాలు కోల్పోయాయి.

గౌహతి, సిల్చార్, జోర్హాట్, దేమాజి జిల్లాల్లో వరదలు తీవ్రంగా ఉన్నాయి. దేమాజి జిల్లాలో 69 గ్రామాలపై వరద ప్రభావం పడింది. రోడ్లు, కాలనీలు ముంపునకు గురయ్యాయి. రైల్వే బ్రిడ్జి కొన్ని కూలిపోగా, హైవేలు కోతకు గురయ్యాయి. లోతట్టు ప్రాంతాల్లో నడుము లోతు నీళ్లు చేరాయి. వాహనాల రాకపోకలు నిలిచిపోయాయి. ప్రజలు ఇళ్లకే పరిమితమవడంతో తీవ్ర ఇబ్బందులు ఎదుర్కొంటున్నారు.

ఈ నేపథ్యంలో కేంద్ర హోమ్ మంత్రి అమిత్ షా అస్సాం ముఖ్యమంత్రి హిమంత బిశ్వశర్మతో ఫోన్‌లో మాట్లాడారు. ప్రాణ నష్టం జరగకుండా అప్రమత్తంగా ఉండాలని సూచించారు. కేంద్రం తరపున అన్ని రకాల సహాయం అందిస్తామని హామీ ఇచ్చారు.

ఇక అరుణాచల్ ప్రదేశ్‌లోనూ వరదల పరిస్థితి ఆందోళనకరంగా ఉంది. తూర్పు సియాంగ్ జిల్లాలో నది పొంగి ప్రవహిస్తోంది. కేఈ పన్యార్ జిల్లాలో 128 కుటుంబాలు వరదల వల్ల తీవ్రంగా ప్రభావితమయ్యాయి. వారిని రెస్క్యూ బృందాలు పునరావాస కేంద్రాలకు తరలించాయి.