వారాంతాల్లో నాటుకోడి మాంసం, పచ్చళ్లు.. కృష్ణాజిల్లా లెక్చరర్ ద్విముఖ విజయగాథ

కృష్ణాజిల్లా గన్నవరం మండలం బి.ఎన్.పురం కాలనీకి చెందిన డాక్టర్ కిషోర్ ఓ ప్రైవేటు కాలేజీలో అసిస్టెంట్ ప్రొఫెసర్‌గా పనిచేస్తున్నారు. ఆయన ఎకనామిక్స్‌లో పీహెచ్‌డీ పూర్తి చేశారు.

ఉద్యోగంతో పాటు వారాంతాల్లో నాటుకోడి మాంసం అమ్మకాలు, నాన్‌వెజ్ పచ్చళ్ల తయారీ వ్యాపారం నిర్వహిస్తున్నారు. 2000 సంవత్సరంలో ఏడవ తరగతి చదువుతున్నప్పుడే చిన్నతరహాలో నాటుకోళ్ల పెంపకం ప్రారంభించారు.

ఆదివారం రోజున నాటుకోడి మాంసాన్ని విక్రయిస్తారు. గత 25 ఏళ్లుగా ఈ వ్యాపారాన్ని కొనసాగిస్తున్నట్లు కిషోర్ తెలిపారు. మారుమూల పల్లెల నుంచి సేకరించిన ఒరిజినల్ నాటుకోళ్లను, 3–4 నెలల వయసున్న కోడిపిల్లలను పెంపకం కోసం ఆంధ్రప్రదేశ్, తెలంగాణ, ఒడిశా, తమిళనాడు రాష్ట్రాలకు సప్లై చేస్తున్నారు.

నాటుకోడి మాంసంలో కొవ్వు తక్కువగా ఉండి, మధుమేహం, థైరాయిడ్, గుండె జబ్బుల నియంత్రణకు ఉపయోగపడుతుందని కిషోర్ వివరించారు. ఆయన వద్ద ఒరిజినల్ నాటుకోడితో పాటు బీవీ38, సోనాలి అసీల్ క్రాస్ బ్రీడ్ వంటి రకాలు ఉన్నాయి. ధరలు ఒరిజినల్ నాటుకోడి కిలో రూ.800, బీవీ38 రూ.400–450, సోనాలి అసీల్ రూ.280–300గా ఉన్నాయి.

ఆయన ‘నాన్‌వెజ్ పికిల్స్ హబ్’ పేరుతో పచ్చళ్ల తయారీ కూడా చేస్తున్నారు. నాటుకోడి పచ్చడి కిలో రూ.1500–1800, బ్రాయిలర్ చికెన్ పచ్చడి రూ.800–1000, మటన్ పచ్చడి రూ.1800, చేపల పచ్చడి రూ.1200, పీతల పచ్చడి రూ.1000 చొప్పున అమ్ముతున్నారు. విదేశాలకు ప్రత్యేక ప్యాకింగ్‌తో అంతర్జాతీయ కొరియర్ ద్వారా పచ్చళ్లను పంపిస్తున్నారు.

ఉద్యోగంతో పాటు స్వంత వ్యాపారం నిర్వహించడం ద్వారా అదనపు ఆదాయాన్ని సమకూర్చుకుంటున్న డాక్టర్ కిషోర్ ప్రయత్నం చాలా మందికి స్ఫూర్తి అని స్థానికులు అంటున్నారు.