గచ్చిబౌలి అంజయ్‌నగర్‌లో నాలా ఆక్రమించిన భవనాల కూల్చివేతలు

హైదరాబాద్ గచ్చిబౌలి అంజయ్‌నగర్‌లో అధికారులు అక్రమ కట్టడాలను కూల్చివేస్తున్నారు. ఇటీవల ఈ ప్రాంతంలో ఒక భవనం కూలిన నేపథ్యంలో ఈ చర్యలు జరుగుతున్నాయి.

కూలిన భవనానికి ఆనుకుని ఉన్న భవనం ప్రభుత్వ నాలాను పూర్తిగా ఆక్రమించి నిర్మించినట్టు అధికారులు గుర్తించారు. ఇది G+6 భవనం కాగా, పైన పెంట్‌హౌస్ కూడా ఉంది. దీంతో అధికారులు భవనంలో ఉన్న విద్యార్థులు, IT ఉద్యోగులను సహా చుట్టుపక్కల నివాసితులను ఖాళీ చేయించారు.

HYDRAA, హైదరాబాద్ పోలీస్ కమిషనరేట్, GHMC అధికారులు పరిశీలించి భద్రతా చర్యలు తీసుకున్నారు. ఆ తర్వాత కూల్చివేతలు ప్రారంభించారు. చుట్టుపక్కల భవనాలు ఆనుకుని ఉండడంతో నెమ్మదిగా కూల్చివేతలు కొనసాగుతున్నాయి. ఈ పని రాత్రంతా కొనసాగే అవకాశం ఉందని అధికారులు తెలిపారు.

నిర్లక్ష్యం, అవినీతి ఆరోపణలు ఎదుర్కొన్న అధికారులను GHMC సస్పెండ్ చేసినట్టు ప్రకటించింది. స్థానికులు తాము నాలా ఆక్రమణపై ఫిర్యాదులు చేసినా అధికారులు స్పందించలేదని చెప్తున్నారు. అధికారులు ఎందుకు చర్యలు తీసుకోలేదని స్థానికులు ప్రశ్నిస్తున్నారు.

ప్రభుత్వ నాలాలపై అక్రమ నిర్మాణాలపై అధికారులు దర్యాప్తు చేస్తున్నారు. అక్రమంగా కట్టిన భవనాలను పూర్తిగా కూల్చివేస్తామని HYDRAA కమిషనర్ రంగనాథ్ హెచ్చరించారు. ప్రభుత్వ నాలాలపై కట్టిన భవనాలను వదిలే ప్రసక్తే లేదని ఆయన తెలిపారు.