అయోధ్య రామమందిరం హుండీ చోరీ: నిందితుడు లగ్జరీ కారు, ఇల్లు కొనుగోలు — SIT దర్యాప్తులో వెల్లడి

అయోధ్య రామమందిరం హుండీ చోరీ కేసులో SIT దర్యాప్తులో నిందితులు దొంగతనంగా తీసుకున్న డబ్బుతో లగ్జరీ కారు, ఇల్లు కొనుగోలు చేసినట్లు తేలింది. ఇప్పటి వరకు ఎనిమిది మందిని అరెస్టు చేయగా, అందులో ఇద్దరు ఒకే కుటుంబానికి చెందిన వారు.

నిందితుడు అనుకల్ప తన బావ లవకుష్ మిశ్రాను తన పలుకుబడితో క్యాష్ లెక్కపెట్టే టీం లోకి తీసుకున్నాడు. చోరీ చేసిన కానుకల పంపకాల్లో విభేదాల కారణంగా ఈ విషయం వెలుగులోకి వచ్చినట్లు తెలుస్తోంది.

SIT బృందం అనుకల్ప స్వగ్రామం బసావానాలో విచారణ జరిపి గ్రామస్థులను ప్రశ్నించింది. సాదా సీదాగా ఉన్న మిశ్రా కుటుంబం ఒక్కసారిగా సంపన్నంగా మారిందని, ఇల్లు, స్కార్పియో కారు కొనుగోలు చేసిందని, జీవనశైలిలో పూర్తి మార్పు వచ్చిందని గ్రామస్థులు తెలిపారు. ఇటీవల ఆ కుటుంబం ఏడు రోజుల పాటు గ్రామంలో పండుగ నిర్వహించి, మత గురువులను ఆహ్వానించి ఉపన్యాసాలు ఇప్పించినట్లు అనుకల్ప మిశ్రా తాత రాజేంద్ర ప్రసాద్ వెల్లడించారు. ఈ భారీ కార్యక్రమం కోసం నిధులు ఎక్కడి నుంచి వచ్చాయనే కోణంలో పోలీసులు విచారణ జరుపుతున్నారు.

SIT అధికారులు ఎనిమిది మంది నిందితుల ఆర్థిక పరిస్థితులు, ఆస్తులపై దర్యాప్తు చేస్తున్నారు. త్వరలో నివేదిక ఇవ్వనున్నారు. ట్రస్ట్ పెద్దలకు ఇంకా క్లీన్ చిట్ లభించలేదు. రామాలయం భద్రతా ఏర్పాట్లు, కంట్రోల్ రూమ్ ఇంచార్జ్, భద్రతా సిబ్బంది, పీఏసీ పోలీసుల పాత్రపై కూడా విచారణ జరుగుతోంది. సమగ్ర విచారణ తర్వాత విభాగపరమైన చర్యలు తప్పవని భావిస్తున్నారు.