అయోధ్య రామాలయ నిధి చోరీ: 8 మంది నిందితుల ఆస్తులపై SIT దర్యాప్తు

అయోధ్య రామాలయ నిధి చోరీ కేసులో SIT అధికారులు దర్యాప్తు కొనసాగిస్తున్నారు. ఇప్పటివరకు ఎనిమిది మంది అనుమానితులను అరెస్టు చేసినట్లు అధికారులు తెలిపారు.

ఈ వ్యవహారంలో ప్రధాన నిందితుడిగా అనుకల్ప్ మిశ్రా పేరు తెరపైకి వచ్చింది. మూడేళ్ల క్రితం బ్యాంక్ అవుట్సోర్సింగ్ ఉద్యోగిగా ఉన్న అనుకల్ప్, విరాళాల లెక్కింపు బృందంలో చేరాడు. తన బావ లవకుష్ మిశ్రాను కూడా పనిలోకి తీసుకున్నాడు. వీరిద్దరూ కలిసి నిధులు చోరీ చేసినట్లు SIT అనుమానిస్తోంది.

SIT అధికారులు అనుకల్ప్ స్వగ్రామానికి వెళ్లి విచారణ చేపట్టారు. స్థానికుల సమాచారం ప్రకారం, ఇటీవల మిశ్రా కుటుంబం ఆర్థిక పరిస్థితి బాగా మారింది. వారు కొత్త ఇల్లు, స్కార్పియో వాహనం, ఫార్మ్ హౌస్ కొనుగోలు చేసినట్లు తేలింది. లవకుష్ మిశ్రా లక్ష రూపాయల విలువైన కొత్త బైక్ కొన్నట్లు ఆధారాలు లభించాయి.

ఈ నిందితులు తమ గ్రామంలో ఏడు రోజుల పాటు భారీ మత పండగ నిర్వహించారు. మత గురువులను, ప్రముఖులను ఆహ్వానించారు. శ్రీరామ జన్మభూమి తీర్థక్షేత్ర ట్రస్ట్ మాజీ ప్రధాన కార్యదర్శి చంపత్రాయ్ కూడా ఈ కార్యక్రమానికి హాజరైనట్లు గ్రామస్తులు తెలిపారు. ఈ ఖర్చుకు డబ్బు ఎక్కడి నుంచి వచ్చిందని SIT ఆరా తీస్తోంది.

మొత్తం ఎనిమిది మంది నిందితుల ఆర్థిక లావాదేవీలు, ఆస్తిపాస్తులపై SIT ప్రత్యేక దృష్టి పెట్టింది. ఈ దర్యాప్తు పూర్తయ్యాక త్వరలో నివేదిక ఇవ్వనున్నట్లు అధికారులు చెబుతున్నారు.