అయోధ్య రామ మందిర ట్రస్ట్ సీఈఓ పదవికి 24 గంటల్లో 1000కు పైగా దరఖాస్తులు

శ్రీరామ జన్మభూమి తీర్థక్షేత్ర ట్రస్ట్ చీఫ్ ఎగ్జిక్యూటివ్ ఆఫీసర్ (సీఈఓ) పదవి కోసం నోటిఫికేషన్ విడుదలైంది. ఈ నోటిఫికేషన్ వెలువడిన 24 గంటల్లోనే 1000కు పైగా దరఖాస్తులు వచ్చాయి.

దరఖాస్తుదారులలో వివిధ రాజకీయ నేపథ్యాలు, మాజీ ఉన్నతాధికారులు, వివిధ రంగాల నిపుణులు ఉన్నారు. మాజీ ఐపీఎస్ అధికారి అమితాబ్ ఠాకూర్ కూడా ఈ పోటీలో ఉన్నట్లు సమాచారం. ఈ నెల 18 వరకు దరఖాస్తు చేసుకోవచ్చు.

ఎంపిక కమిటీలో సుప్రీంకోర్టు మాజీ న్యాయమూర్తి జస్టిస్ ప్రమోద్ కోహ్లీ, లెఫ్ట్నెంట్ జనరల్ రిటైర్డ్ విష్ణుకాంత్ చతుర్వేది, శ్రీ సాయిబాబా సంస్థాన్ ట్రస్ట్ చైర్మన్ సురేష్ ఉన్నారు. ఈ నెల 19న సమావేశమై దరఖాస్తులను పరిశీలించి, అర్హుల జాబితా సిద్ధం చేస్తారు. తుది నిర్ణయం 22న జరిగే ట్రస్ట్ సమావేశంలో తీసుకునే అవకాశం ఉంది.

ఈ పదవికి దరఖాస్తు చేసుకునేవారు 50-70 ఏళ్ల మధ్య వయస్సు కలిగి ఉండాలి. కనీసం 20 ఏళ్ల పరిపాలన అనుభవం, అయోధ్యలో నివసించే సంసిద్ధత, హిందూ మత వంశీకులు కావడం, రామునిపై విశ్వాసం, హిందీ, ఇంగ్లీష్ భాషలపై పట్టు తప్పనిసరి. షార్ట్ లిస్ట్ చేసిన వారిని ప్రత్యక్షంగా లేదా ఆన్‌లైన్ ద్వారా ఇంటర్వ్యూలకు ఆహ్వానిస్తారు.