అయోధ్య రామాలయంలో విరాళాల దుర్వినియోగంపై SIT దర్యాప్తు; సిబ్బంది చేతివాటం వెల్లడి

అయోధ్య రామాలయంలో భక్తులు సమర్పించిన విరాళాల దుర్వినియోగంపై SIT దర్యాప్తు చేపట్టింది. విరాళాలను లెక్కించే సిబ్బందే నగదు, బంగారు ఆభరణాలను తస్కరించినట్లు దర్యాప్తులో తేలింది.

బ్యాంకుకు జమ చేసే సమయంలో నోట్ల కట్టల్లో డబ్బు తక్కువ రావడంతో ఆలయ అధికారులకు అనుమానం వచ్చింది. హుండీల్లో రోజూ సగటున ఆరు నుంచి ఏడు లక్షల రూపాయలు వస్తుండగా, 500 రూపాయల నోట్ల కట్టల్లో పదేపదే నగదు తగ్గడం గమనించారు. అప్రమత్తమైన అధికారులు లెక్కింపు గదిలో రహస్య కెమెరాలు ఏర్పాటు చేశారు. ఆ కెమెరాల్లో సిబ్బంది సీసీటీవీ కెమెరాలకు అడ్డుగా నిలబడి నోట్ల కట్టల నుంచి నగదు తీసి దాచుకోవడం రికార్డైంది.

ఈ ఏడాది ఏప్రిల్ 27 నుంచి జూన్ 5 మధ్య 70 సార్లు ఇలాంటి చోరీలు జరిగినట్లు SIT నివేదిక పేర్కొంది. నిందితులు నోట్ల కట్టలు కట్టేటప్పుడు అదనపు నోట్లు చేర్చి, బ్యాంకుకు తరలించేటప్పుడు వాటిని తొలగించేవారు. బ్యాంక్‌లో కట్టల సంఖ్య మాత్రమే లెక్కించడంతో ఇన్నాళ్లు మోసం బయటపడలేదు. నగదుతో పాటు బంగారు కమ్మలు, వెండి ఆభరణాలను సైతం రికార్డుల్లో నమోదు చేయకుండా కాజేశారు.

ప్రధాన నిందితుడు అనుకూల్ మిశ్రా, అతని బావమరిది లవకుష్ మిశ్రా కలిసి చోరీకి పాల్పడ్డారు. లవకుష్ మిశ్రా ఇంట్లో పోలీసులు 10 లక్షల నగదు స్వాధీనం చేసుకున్నారు. అవినాష్ పాండే అనే మరో నిందితుడు చోరీ డబ్బును తన బ్యాంకు ఖాతాల్లో జమ చేశాడు. చోరీ చేసిన డబ్బును ముందు ఆలయ సముదాయంలోని మరుగుదొడ్లలో దాచి, ఆ తర్వాత బయటకు తరలించేవారు.

ఈ ఘటనపై నైతిక బాధ్యత వహించి శ్రీరామ జన్మభూమి తీర్థ క్షేత్ర ట్రస్ట్ ప్రధాన కార్యదర్శి చంపత్ రాయ్, ట్రస్ట్ సభ్యుడు అనిల్ మిశ్రా తమ పదవులకు రాజీనామా చేశారు. విరాళాల లెక్కింపు విభాగంలో సిఫారసుల ద్వారానే నియామకాలు జరిగినట్లు, సిబ్బందిని తనిఖీ చేయకపోవడమే ప్రధాన కారణమని దర్యాప్తు అధికారులు గుర్తించారు.

2024లో రామ మందిరం ప్రారంభమైనప్పటి నుంచి ఈ దందా కొనసాగుతున్నట్లు అంచనా. ఇప్పటివరకు సుమారు 7 నుంచి 7.5 కోట్ల రూపాయల నగదు, ఆభరణాలు తస్కరించినట్లు SIT అంచనా వేసింది. 70 లక్షల నగదు మాత్రమే రికవరీ అయింది. ఈ కేసులో మరింత దర్యాప్తు కొనసాగుతోంది.