బద్రీనాథ్ ధామంలో విరాళాల చోరీ ఆరోపణ; అయోధ్య కేసులో సిట్ కీలక వివరాలు

బద్రీనాథ్ ధామంలో భక్తులు సమర్పించిన కానుకల దొంగతనం జరిగినట్లు భైరవ్ సేన అనే హిందూ సంస్థ ఆరోపించింది. జూలై 2న ఉదయం లెక్కింపు సమయంలో ఈ చోరీ జరిగిందని సంస్థ వ్యవస్థాపక అధ్యక్షుడు సందీప్ ఖత్రి ఆలయ కమిటీ సీఈవో సోహన్ సింగ్ రంగత్‌కు ఫిర్యాదు చేశారు.

ఫిర్యాదు ప్రకారం, ఆలయ కమిటీ చైర్మన్ పర్సనల్ అసిస్టెంట్‌గా చలామణి అవుతున్న ప్రమోద్ నౌటియాల్ కానుకల నుండి సొమ్మును అపహరించారని, తక్షణం ఎఫ్ఐఆర్ నమోదు చేసి దర్యాప్తు చేయాలని డిమాండ్ చేశారు. ఈ ఘటనపై అంతర్గత విచారణ ప్రారంభించిన ఆలయ అధికారులు సీసీటీవీ ఫుటేజీని పరిశీలించారు. లెక్కింపులో పాల్గొన్న ఉద్యోగులకు షోకాస్ నోటీసులు జారీ చేసి వివరణ కోరారు.

మరోవైపు, అయోధ్య రామ మందిరం విరాళాల దుర్వినియోగం కేసులో స్పెషల్ ఇన్వెస్టిగేషన్ టీం (సిట్) దర్యాప్తు కొనసాగుతోంది. నిందితుల్లో ఒకరైన అవినాష్ ఇచ్చిన వాంగ్మూలంలో, దొంగిలించిన డబ్బుతో తాను బ్రెజా కారు కొనుగోలు చేసినట్లు, ఇల్లు నిర్మించుకుని సోదరునికి ఆర్థిక సహాయం చేసినట్లు అంగీకరించారు. ఆలయంలో చోరీ ఎలా చేయాలో అక్కడి ఉద్యోగులకు ఒక ప్రధాన సూత్రదారి శిక్షణ ఇచ్చాడని దర్యాప్తు సంస్థలు కనుగొన్నాయి.

దర్యాప్తులో మరో కీలక అంశం వెలుగులోకి వచ్చింది. శ్రీరామ జన్మభూమి తీర్థక్షేత్ర ట్రస్ట్ బ్యాంక్ ఖాతాల్లో ఇటీవల రోజువారీ విరాళాలు గణనీయంగా పెరిగాయి. గతంలో రోజుకు సగటున రూ.16-18 లక్షలు జమయ్యేవి, కానీ దర్యాప్తు ప్రారంభించాక అదే మొత్తం రూ.24-26 లక్షలకు చేరడంతో, అంతకుముందు రోజుకు దాదాపు రూ.6-8 లక్షల విరాళాలు మాయం అయినట్లు సిట్ అనుమానిస్తోంది. దీంతో గత ఐదేళ్ల ఆర్థిక లావాదేవీలను రీఆడిట్ చేయాలని నిర్ణయించారు. బంగారం, వెండి విరాళాలను కర్ణాటకకు తరలించి కరిగించినట్లు, భూ రికార్డుల్లో అవకతవకలు జరిగినట్లు ఆరోపణలు ఉన్నాయి. అనిల్ మిశ్రా, చంపత్ రాయ్ సాయం చేసినట్టు కొన్ని నివేదికలు పేర్కొంటున్నాయి.

ప్రస్తుతం ఎస్బీఐ, పీఎన్‌బీ, యూపీ బ్యాంక్ లావాదేవీలను అధికారులు పరిశీలిస్తున్నారు.