ఆషాడంలో 7 దేవాలయాలకు బంగారు బోనం; ఉమ్మడి దేవాలయాల కమిటీ షెడ్యూల్ విడుదల

హైదరాబాద్‌లో ఈ ఏడాది బోనాల జాతర సందర్భంగా ఏడు ప్రధాన ఆలయాలకు బంగారు బోనం సమర్పించనున్నట్లు ఉమ్మడి దేవాలయాల ఊరేగింపు కమిటీ ప్రకటించింది. కమిటీ ఛైర్మన్ మధుసూదన్ యాదవ్ ఈ వివరాలు వెల్లడించారు.

ఈ కార్యక్రమం జూలై 16న గోల్కొండ జగదంబ ఆలయంతో ప్రారంభమవుతుంది. ఆ తర్వాత 19న జూబ్లీహిల్స్ పెద్దమ్మ ఆలయంలో, 22న బాల్కంపేట ఎల్లమ్మ ఆలయంలో (కల్యాణం జూలై 21) బంగారు బోనం సమర్పిస్తారు. 26న విజయవాడ కనకదుర్గ ఆలయానికి వెళ్తారు. 30న సికింద్రాబాద్ భాగ్యలక్ష్మి ఆలయంలో, ఆగస్టు 2న ఘటాలూరు గంపు ఆలయంలో బంగారు బోనం కార్యక్రమం జరుగుతుంది.

హరిబౌలిలోని బంగారు మైసంబ ఆలయంలో బంగారు బోనం తయారవుతుంది. అక్కడి నుంచి డప్పు చప్పుళ్లు, పోతరాజుల ఆటలతో ఇతర ఆలయాలకు తరలిస్తారు. విజయవాడ కనకదుర్గ ఆలయం నుంచి పట్టు వస్త్రాలు హైదరాబాద్ ఆలయాలకు అందిస్తారు. కమిటీ గత 16 ఏళ్లుగా బంగారు బోనం కార్యక్రమం నిర్వహిస్తోంది.

ఆలయాల మరమ్మతు, పెయింటింగ్, ఫ్లోరింగ్ పనులు ఇప్పటికే మొదలయ్యాయి. జూలై 16 నాటికి పూర్తవుతాయి. దేవాదాయ శాఖ నుంచి ఆలయాలకు చెక్కుల పంపిణీ ఇంకా ప్రారంభం కాలేదు. పండగకు వారం ముందు చెక్కులు అందిస్తామని మంత్రి హామీ ఇచ్చినట్లు ఛైర్మన్ తెలిపారు. ప్రభుత్వ సాంస్కృతిక శాఖ కూడా బోనాల జాతరకు సహకారం అందిస్తోంది.

తెలంగాణ ప్రాంతీయ బోనాల జాతర విశిష్టతను దేశవ్యాప్తంగా ప్రజలకు చేరువ చేయడమే కమిటీ ప్రధాన ఉద్దేశమని ఛైర్మన్ పేర్కొన్నారు.