జర్రెలలో బాక్సైట్ నమూనాల సేకరణపై గిరిజనుల ఆందోళన; మైనింగ్ లేదని జాయింట్ కలెక్టర్ స్పష్టీకరణ

అల్లూరి సీతారామరాజు జిల్లా జర్రెల బ్లాక్ గోపురం కొండలపై ఇటీవల కొంతమంది యువకులు మట్టి, రాళ్ల నమూనాలు సేకరించారు. స్థానిక గిరిజనులు వారిని అనుమానించి పోలీసులకు అప్పగించారు. ఆ బృందం ఎలాంటి అధికారిక ధృవీకరణ చూపించలేదు. బాక్సైట్ తవ్వకాల కోసం రహస్యంగా సర్వే జరుగుతోందని గ్రామస్థులు ఆందోళన వ్యక్తం చేశారు. పెద్ద సంఖ్యలో గిరిజనులు ఆయుధాలు పట్టి రోడ్లపై నిరసన తెలిపారు. తమ అస్తిత్వాన్ని, పర్యావరణాన్ని కాపాడేందుకు ఎలాంటి మైనింగ్ ప్రయత్నాలనైనా తిప్పికొట్టాలని వారు హెచ్చరించారు.

ఈ నేపథ్యంలో జిల్లా జాయింట్ కలెక్టర్ తిరుమణి శ్రీపూజ కీలక ప్రకటన చేశారు. నమూనాల సేకరణ బాక్సైట్ కోసం కాదని, అది జియోలాజికల్ సర్వే ఆఫ్ ఇండియా (GSI) సహకారంతో ఒక ప్రైవేట్ సంస్థ చేస్తున్న టోపోగ్రాఫికల్ సర్వే మాత్రమేనని వివరించారు. మైనింగ్ కి ఎటువంటి అనుమతులు జారీ చేయలేదన్నారు. ప్రస్తుతం జిల్లాలో ఎలాంటి బాక్సైట్ లీజు లేదు. గత లీజులు కూడా రద్దు అయ్యాయని తెలిపారు. ఎవరైనా సర్వే చేయాలంటే జిల్లా యంత్రాంగం నుంచి ముందస్తు అనుమతి తప్పనిసరి అని చెప్పారు. సంబంధిత వ్యక్తులు ఇప్పటికే పోలీసులకు పట్టుబడ్డారని, ఇకపై ఇలాంటి కార్యకలాపాలు జరగకుండా చూడాలని ఎస్పీకి సూచించినట్లు వివరించారు. గ్రామసభ, కాలుష్య నియంత్రణ మండలి అనుమతి లేకుండా మైనింగ్ జరగదని ప్రజలకు భరోసా ఇచ్చారు.

విశాఖ మన్యంలో బాక్సైట్ వివాదం దశాబ్దాల నాటిది. గతంలో ఏపీఎండిసి కి కేటాయించిన లీజులను 2016లో టీడీపీ ప్రభుత్వం, 2019లో వైఎస్ఆర్సీపీ ప్రభుత్వం రద్దు చేశాయి. ప్రస్తుత కూటమి ప్రభుత్వంపై ఇప్పుడు అనుమానాలు వ్యక్తమవుతున్నాయి. వైఎస్ఆర్సీపీ నాయకులు బాక్సైట్ తవ్వకాలకు తీవ్ర వ్యతిరేకత వ్యక్తం చేస్తూ ఆదివాసులకు మద్దతు ప్రకటించారు. కొన్ని వామపక్ష పార్టీలు అటవీ శాఖ మంత్రిగా ఉన్న ఉప ముఖ్యమంత్రి దీనిపై స్పష్టమైన ప్రకటన చేయాలని డిమాండ్ చేశాయి. స్థానిక టీడీపీ నేతలు ఇంకా స్పందించలేదు.