బంగాళాఖాతంలో మరో అల్పపీడనం.. ఏపీపై ప్రస్తుతానికి ప్రభావం లేదు

ఆగ్నేయ బంగాళాఖాతంలో శుక్రవారం నాటికి అల్పపీడనం ఏర్పడే అవకాశం ఉందని IMD హెచ్చరించింది. దక్షిణ అండమాన్ సముద్రంలో ఏర్పడిన ఉపరితల ఆవర్తనం దీనికి కారణమని తెలిపింది.

ఈ అల్పపీడనం శనివారం నాటికి బలమైన అల్పపీడనంగా మారుతుంది. ఆదివారం నాటికి అది వాయుగుండంగా బలపడే అవకాశం ఉందని APSDMA తెలిపింది. వ్యవస్థ వాయువ్య దిశగా కదులుతూ 24 గంటల్లో మరింత బలపడుతుందని అధికారులు చెప్పారు.

ఉపరితల ఆవర్తనం సముద్ర మట్టానికి 5.8 కిలోమీటర్ల ఎత్తు వరకు విస్తరించి ఉందని వాతావరణ శాఖ అధికారులు తెలిపారు. శనివారం నుంచి మంగళవారం వరకు సముద్రం అలజడిగా ఉంటుంది. మత్స్యకారులు వేటకు వెళ్లవద్దని హెచ్చరికలు జారీ అయ్యాయి. పరిస్థితిని బట్టి పోర్టు ప్రమాద హెచ్చరికలు జారీ చేస్తామని అధికారులు తెలిపారు.

ప్రస్తుతానికి ఆంధ్రప్రదేశ్‌పై ఈ వ్యవస్థ ప్రభావం లేదని APSDMA స్పష్టం చేసింది. కోస్తాంధ్ర, రాయలసీమలో ఈరోజు, రేపు పొడి వాతావరణం ఉంటుంది. ఈ నెల 13వ తేదీ తర్వాత కోస్తాంధ్ర జిల్లాల్లో అక్కడక్కడా వర్షాలు కురిసే అవకాశం ఉంది. మొత్తంగా దీని ప్రభావం పెద్దగా ఉండకపోవచ్చని అధికారులు అంచనా వేస్తున్నారు.