భగినీ హస్త భోజనం: కార్తీక మాసంలో అన్న చెల్లెళ్ల పండుగ వెనుక కథ

భగినీ హస్త భోజనం కార్తీక మాసంలో రెండవ రోజు జరుపుకునే పండుగ. ఇది అన్న చెల్లెళ్ల సంబంధానికి సంబంధించిన పండుగ.

ఈ రోజున అక్క లేదా చెల్లి తన అన్న లేదా తమ్ముడికి స్వయంగా వంట చేసి పెడుతుంది. అన్నదమ్ములు అక్క చెల్లెళ్ల ఇంటికి వెళ్లి వారి చేతి మీద భోజనం చేస్తారు. సంప్రదాయ నమ్మకం ప్రకారం ఈ వ్రతం వల్ల అన్నదమ్ములకు అకాల మృత్యువు ఉండదు. అక్క చెల్లెళ్లకు సౌభాగ్య సిద్ధి కలుగుతుంది.

ఈ పండుగ వెనుక ఒక పురాణ కథ ఉంది. యమునా నది, యమధర్మరాజు, శనిదేవుడు ముగ్గురు సూర్యుడికి సంతానం. యమున చిన్నది, యమధర్మరాజు, శని పెద్దవారు.

యమున తన అన్న యమధర్మరాజును భోజనానికి పిలిచింది. ప్రాణుల ధర్మ నిర్ణయంలో బిజీగా ఉన్న యమధర్మరాజు రెండుసార్లు రాలేకపోయాడు. మూడోసారి కాస్త సమయం కేటాయించి యమున ఇంటికి వెళ్లాడు. ఆమె పెట్టిన భోజనానికి తృప్తి చెంది వరం కోరుకోమని అడిగాడు.

యమున తనకు ఒక్కదానికే కాదు, స్త్రీలందరికీ వరం కావాలని కోరింది. ఈ రోజు అక్క చెల్లెళ్ల చేతి భోజనం చేసే అన్నదమ్ములకు అకాల మృత్యువు ఉండకూడదని కోరింది. యమధర్మరాజు ఆ వరం ఇచ్చి, ఆమెకు సౌభాగ్యం కలగాలని ఆశీర్వదించాడు.