నవంబర్ 1 ఆదివారం భాను సప్తమి, రవి పుష్య యోగం కలయిక

నవంబర్ 1, ఆదివారం సప్తమి తిథి, పుష్యమి నక్షత్రం కలిసి వస్తున్నాయి. ఈ కలయికను భాను సప్తమి అంటారు. ఆదివారం పుష్యమి నక్షత్రంతో కలిస్తే దాన్ని రవి పుష్య యోగం అని జ్యోతిష్య శాస్త్రం చెబుతోంది. ఈ రెండు కలిసి రావడం అరుదని చెబుతారు.

ఆదివారం సూర్యుడికి ఇష్టమైన వారం. సప్తమి తిథి కూడా సూర్యుడికి ఇష్టమని భావిస్తారు. అందుకే భాను సప్తమి రోజు సూర్యుడిని పూజిస్తే మంచి ఫలితం ఉంటుందని చెబుతారు. జాతకంలో సూర్యుడు రాహువు లేదా కేతువుతో కలిస్తే సూర్య గ్రహణ దోషం ఏర్పడుతుందని జ్యోతిష్య శాస్త్రం చెబుతోంది. ఈ దోషం ఉన్నవారు భాను సప్తమి రోజు పూజలు చేయాలని సూచిస్తున్నారు.

ఆ రోజు స్నానం చేసే నీళ్లలో ఎర్రపూలు కొన్ని వేసుకోవాలి. కుంకుమ, ఎర్ర చందనం కూడా కలుపుకోవచ్చు. స్నానం చేస్తూ సూర్యుడి ధ్యాన శ్లోకాన్ని ఆరు సార్లు చదవాలి. తర్వాత రాగి చెంబులో నీళ్లు తీసుకోవాలి. అందులో కుంకుమ కలిపిన అక్షింతలు, ఎర్రపూలు వేయాలి. తూర్పు దిక్కు చూస్తూ ఆ నీళ్లను నేలపై వదులుతూ అర్ఘ్యం ఇవ్వాలి. ఆ సమయంలో 'ఓం ఘృణి సూర్య ఆదిత్య' మంత్రాన్ని 12 సార్లు చదవాలి.

పూజ గదిలో లేదా హాల్లో తూర్పు వైపు పీట ఉంచాలి. పసుపు, కుంకుమతో బొట్లు పెట్టి బియ్యప్పిండితో ముగ్గు వేయాలి. మట్టి ప్రమిదలో నువ్వుల నూనె పోసి, కుంకుమ రాసిన 12 వత్తులు వేసి దీపం వెలిగించాలి. ఆ వత్తులు తూర్పు వైపు వెలగాలి. ఉపవాసం ఉండేవారు పగలు పాలు, పళ్లు తీసుకోవచ్చు. చీకటి పడ్డాక గోధుమ రవ్వతో చేసిన పదార్థాలు తినాలని సూచిస్తున్నారు.

జ్యోతిష్య శాస్త్రం ప్రకారం పుష్యమి నక్షత్రం ఉన్న రోజు పెళ్లి చేయకూడదు. ఈ రోజు ఎంత విశేషమైనా వివాహానికి మాత్రం అనుకూలం కాదని చెబుతారు. ఈ యోగం ఉన్న రోజు బంగారం, వెండి కొనుగోలు చేయడం శుభమని కూడా చెబుతారు. పూజలు చేయలేని వారు 'ఓం నమో భగవతే శ్రీ సూర్యాయ నమః' మంత్రాన్ని 12 సార్లు చదవాలని సూచన.