బత్తాయి తోటలకు ఏడాదికి రెండుసార్లు ఎరువులు: డిసెంబర్-జనవరిలో తొలి దఫా

బత్తాయి సాగులో తెలుగు రాష్ట్రాలు దేశంలోనే ముందు వరుసలో ఉన్నాయి. ఈ తోటలకు ఏడాదికి రెండుసార్లు ఎరువులు అందించాలి. మొదటి దఫా ఎరువులు డిసెంబర్, జనవరి నెలల్లో వేయాల్సి ఉంటుంది.

తెలంగాణలో నల్గొండ, ఆంధ్రప్రదేశ్‌లో అనంతపురం, ప్రకాశం, కడప, నెల్లూరు, పశ్చిమ గోదావరి, గుంటూరు జిల్లాల్లో బత్తాయి తోటలు ఎక్కువగా ఉన్నాయి. మొక్కల మధ్య 18 నుంచి 21 అడుగుల దూరం ఉండేలా నాటుతారు. ఎకరాకు 100 నుంచి 135 మొక్కలు వస్తాయి. ఎకరాకు 100 మొక్కలు ఉన్న తోటల్లో గాలి, వెలుతురు బాగా ఉంటాయి. దీంతో చీడపీడల సమస్య తక్కువగా ఉంటుంది.

వేసవి పంటను చిత్తా అని, శీతాకాలపు పంటను ఆరుద్ర అని, వర్షాకాలపు పంటను సీజన్ పంట అని పిలుస్తారు. దాదాపు 80 శాతం మంది రైతులు వేసవి పంటకే మొగ్గు చూపుతున్నారు. గత రెండేళ్లుగా టన్ను బత్తాయి ₹40 వేల నుంచి ₹50 వేల ధర పలుకుతోంది. ఆరు సంవత్సరాలు దాటిన తోటల నుంచి ఎకరాకు 8 నుంచి 10 టన్నుల దిగుబడి వస్తుంది. ఈ ఏడాది అధిక ఎండలు, తీవ్ర వర్షాభావం వల్ల అన్ని ప్రాంతాల్లో దిగుబడి గణనీయంగా పడిపోయింది. ఇప్పుడు కొంతమంది రైతులు వర్షాకాలపు పంట తీసుకుంటుండగా, మరి కొంతమంది వేసవి పంట కోసం తోటలను సిద్ధం చేసుకుంటున్నారు.

పూత నుంచి కాయ పక్వానికి రావడానికి దాదాపు ఏడు నుంచి ఎనిమిది నెలలు పడుతుంది. ఆశించిన దిగుబడి కోసం నత్రజని, భాస్వరం, పొటాష్ అనే ప్రధాన పోషకాలను సకాలంలో అందించాలి. ఒక్కో చెట్టుకు 100 కిలోల పశువుల ఎరువు, 10 కిలోల వేపపిండి లేదా ఆముదపిండి వేయాలి. యూరియా 1600 గ్రాములు, సింగిల్ సూపర్ ఫాస్ఫేట్ 2.5 కిలోలు, పొటాష్ 1 కిలో అందించాలి. చిన్న మొక్కలకు ప్రతి మూడు నెలలకు ఒకసారి తక్కువ మోతాదులో వేయాలి.

ఎరువులు వేసేటప్పుడు మొక్క మొదలు దగ్గర తేమ నిలవకూడదు. అక్కడ తేమ ఎక్కువగా ఉంటే వేరు కుళ్ళు, బంక తెగులు ప్రమాదం పెరుగుతుంది. అందుకే చెట్టు మొదలు నుంచి నాలుగు అడుగుల దూరంలో డబుల్ రింగ్ పద్ధతిలో పాదులు తీయాలి. పాదు లోతు 15 సెంటీమీటర్లకు మించకూడదు. ఎరువు వేసిన తర్వాత మట్టితో కప్పాలి.

బత్తాయి తోటల్లో సూక్ష్మ పోషకాల లోపం ఎక్కువగా కనిపిస్తుంది. రెండు, మూడు సూక్ష్మ పోషకాలు ఒకేసారి లోపిస్తే చెట్లు పాలిపోయి క్షీణించే అవకాశం ఉంది. లీటరు నీటికి జింక్ సల్ఫేట్ 2 గ్రా, మ్యాంగనీస్ సల్ఫేట్ 2 గ్రా, మెగ్నీషియం సల్ఫేట్ 2 గ్రా, ఫెర్రస్ సల్ఫేట్ 1.5 గ్రా, బోరాక్స్ 1.5 గ్రా, కొంత జిగురు కలిపి పిచికారీ చేయాలి. 15 రోజుల వ్యవధిలో రెండుసార్లు చెట్టు మొత్తం తడిచేలా పిచికారీ చేయాలి.

చెట్లను పూతకు వదిలే సమయం ప్రాంతాన్ని బట్టి మారుతుంది. వాతావరణాన్ని బట్టి 15 నుంచి 30 రోజులు వేచి ఉండాలి. ఈ సమయంలో ఎరువులు వేసి తగినంత నీరు పెట్టాలి. సేంద్రియ ఎరువులు, పచ్చిరొట్ట వాడటం వల్ల నేలలో తేమను నిల్వ ఉంచుకునే సామర్థ్యం పెరుగుతుంది.