అల్లూరి జిల్లాలో చెట్టు అడ్డంగా కూలినా.. 108 సిబ్బంది గర్భిణిని కాపాడారు

అల్లూరి సీతారామరాజు జిల్లాలో తుఫాను ప్రభావంతో రోడ్డుపై భారీ చెట్టు కూలినా, 108 అంబులెన్స్ సిబ్బంది ఆరు నెలల గర్భిణిని ఆస్పత్రికి చేర్చారు. వై. రామవరం ప్రాంతానికి చెందిన ఆ గర్భిణి పరిస్థితి ఆమ్నియాటిక్ ఫ్లూయిడ్ లీక్ కావడంతో విషమించింది.

స్థానికుల సమాచారం మేరకు 108 సిబ్బంది ఆమెను ఆస్పత్రికి తీసుకెళ్లేందుకు బయలుదేరారు. తుఫాను ప్రభావంతో వీచిన ఈదురుగాలులకు భారీ చెట్టు రోడ్డుకు అడ్డంగా కూలింది. దీంతో అంబులెన్స్ ముందుకు కదలలేకపోయింది.

వై. రామవరం 108 సిబ్బంది అడ్డతీగల 108 బృందాన్ని సహాయం కోసం సంప్రదించారు. అడ్డతీగల సిబ్బంది తమ అంబులెన్స్‌తో రోడ్డుకు అవతలి వైపు చేరుకున్నారు. కూలిన చెట్టు మీదుగా స్పైన్ బోర్డ్ సాయంతో గర్భిణిని చాలా జాగ్రత్తగా అవతలి వైపు అంబులెన్స్‌కు తరలించారు.

అనంతరం ఆమెను సకాలంలో ఆస్పత్రికి చేర్చి చికిత్స అందించారు. ఈ ఘటనపై స్థానికులు వై. రామవరం, అడ్డతీగల 108 సిబ్బందిని అభినందించారు.