కాకినాడ రూరల్‌లో ఆరా తుఫాన్ ప్రభావం: ఇళ్లలోకి నీరు, మోకాలి లోతు వరద

ఆరా తుఫాన్ ప్రభావంతో కాకినాడ రూరల్‌లోని పగడాలపేట, పల్లిపేట, డ్రైవర్స్ కాలనీ, ముత్తనగర్ ప్రాంతాల్లో ఇళ్లలోకి నీరు చేరింది. రోడ్లపై మోకాలి లోతు వరకు నీరు నిలిచింది.

సముద్రం నుంచి వచ్చిన నీరు రోడ్డు మీదకు చేరడంతో స్థానికులు తీవ్ర ఇబ్బందులు పడుతున్నారు. ఇళ్లలో బియ్యం బస్తాలు, దుస్తులు, ఇతర గృహోపకరణాలు తడిసిపోయాయి. చిన్న పిల్లలు, వృద్ధులు, బాలింతలు ఇబ్బందులు పడుతున్నారని స్థానిక మహిళలు తెలిపారు.

1996 తుఫాన్ తర్వాత ఇంత తీవ్రమైన ప్రభావం చూడలేదని స్థానికులు చెప్తున్నారు. రాత్రి నుంచి నిద్రపోకుండా పిల్లలను కాపాడుకున్నామని, తాగునీరు, ఆహారం అందక ఇబ్బంది పడుతున్నామని మహిళలు తెలిపారు. కొందరు పిల్లలు, బాలింతలతో కలిసి హైస్కూల్ సమీపంలోని పునరావాస కేంద్రానికి వెళ్లారు.

కాకినాడ రూరల్ MLA పంతం నానాజీ ఆదేశాలతో సహాయ చర్యలు చేపడుతున్నామని జనసేన నాయకులు తెలిపారు. పునరావాస కేంద్రాల్లో భోజనం, ఇతర సౌకర్యాలు ఏర్పాటు చేశామని ఆ పార్టీ నాయకులు చెప్పారు. తుఫాన్ వల్ల జరిగిన నష్టాన్ని అంచనా వేసి ప్రభుత్వం దృష్టికి తీసుకెళ్తామని కూడా వారు తెలిపారు.