మనుగూరులో డీఏవీ పాఠశాల ప్రారంభించిన డిప్యూటీ సీఎం భట్టి విక్రమార్క, థర్మల్ విద్యుత్ సమీక్ష

భద్రాద్రి కొత్తగూడెం జిల్లా మనుగూరులో డిప్యూటీ సీఎం భట్టి విక్రమార్క శనివారం పర్యటించారు. భద్రాద్రి పవర్ ప్లాంట్ టౌన్‌షిప్‌లో నూతనంగా నిర్మించిన డీఏవీ ఉన్నత పాఠశాలను ప్రారంభించారు. ఈ సందర్భంగా ఆయన పాఠశాల ఆవరణలో మొక్క నాటారు. అనంతరం టౌన్‌షిప్‌లో ఏర్పాటు చేసిన ఫోటో ప్రదర్శనను సందర్శించారు.

అనంతరం ఆయన థర్మల్ విద్యుత్ కేంద్రాల పనితీరును సమీక్షించారు. ఎల్నినో ప్రభావం వల్ల నాగార్జున సాగర్, శ్రీశైలం జల విద్యుత్ కేంద్రాల్లో నీటి లభ్యత లేకపోవడంతో హైడల్ విద్యుత్ ఉత్పత్తి నిలిచిపోయిందని ఆయన తెలిపారు. ఫలితంగా రాష్ట్రంలో దాదాపు 7000 మెగావాట్ల విద్యుత్ ఉత్పత్తి నిలిచిపోయిందన్నారు. అయితే, ఒక్కసారిగా 16,000 మెగావాట్ల స్థాయికి చేరిన పీక్ విద్యుత్ డిమాండ్‌ను ఎనర్జీ డిపార్ట్‌మెంట్ ఎలాంటి అంతరాయం లేకుండా తీర్చగలిగిందని పేర్కొన్నారు.

సింగరేణి నుంచి సకాలంలో బొగ్గు సరఫరా, జెన్కో నుంచి సకాలంలో విద్యుత్ ఉత్పత్తి జరిగిందని ఆయన అభినందించారు. భవిష్యత్తులో ఏదైనా పీక్ డిమాండ్ ఎదురైనా సమర్థంగా నిర్వహించేలా ముందస్తు ప్రణాళికతో ముందుకు వెళ్లాలని సూచించారు.