భీమిలి రాయనపేటలో ఎంపీటీసీ, జడ్పీటీసీ ఎన్నికలను బహిష్కరించిన గ్రామస్థులు

విశాఖపట్నం జిల్లా భీమిలి మండలం తాళవలస పంచాయతీ పరిధిలోని రాయనపేట గ్రామస్థులు ఎంపీటీసీ, జడ్పీటీసీ ఎన్నికలను బహిష్కరించారు. గ్రామ సమస్యలు పరిష్కరించాలని కోరుతూ ఓటు వేయడానికి నిరాకరించారు.

గ్రామంలో తాగునీటి కోసం వాడుతున్న చెరువు దుర్గంధంతో నిండిపోయిందని గ్రామస్థులు చెప్తున్నారు. మురుగునీరు చేరడంతో తీవ్ర ఇబ్బందులు పడుతున్నామని వారు తెలిపారు. ఈ సమస్యను అధికారులకు, ప్రజా ప్రతినిధులకు పలుమార్లు చెప్పినా పరిష్కారం లేదని ఆవేదన వ్యక్తం చేశారు.

తమ సమస్యలు పరిష్కరించిన తర్వాతే ఓటు వేస్తామని గ్రామస్థులు స్పష్టం చేశారు. దీంతో ఆ పోలింగ్ కేంద్రం వద్ద ఉద్రిక్తత నెలకొంది. ఈ బహిష్కరణపై అధికారుల స్పందన తెలియాల్సి ఉంది.

మిగిలిన ప్రాంతాల్లో పోలింగ్ ప్రశాంతంగా జరిగింది. విశాఖపట్నం జిల్లాలో 203 పోలింగ్ కేంద్రాల్లో 4 జడ్పీటీసీ, 53 ఎంపీటీసీ స్థానాలకు ఎన్నిక జరిగింది. అనకాపల్లి జిల్లాలో దాదాపు 1,530 బూతుల్లో పోలింగ్ ప్రారంభమైంది.

అల్లూరు సీతారామరాజు జిల్లాలో 11 జడ్పీటీసీ, 70 ఎంపీటీసీ స్థానాలకు ఎన్నిక జరుగుతోంది. గిరిజన ప్రాంతాల్లో పోలింగ్ మూడు గంటల వరకే ఉంటుంది. మిగిలిన ప్రాంతాల్లో సాయంత్రం 5 గంటల వరకు ఓటు వేయవచ్చు. ఉత్తరాంధ్రలో పోలీసులు కట్టుదిట్టమైన భద్రత ఏర్పాటు చేశారు.