నెల్లూరు జిల్లాలో కుండపోత వర్షాలు: రోడ్లు జలమయం, ZPTC-MPTC పోలింగ్ ప్రభావితం

నెల్లూరు జిల్లాలో ఉదయం నుంచి కుండపోత వర్షాలు కురుస్తున్నాయి. నెల్లూరు నగరంతో పాటు జిల్లాలోని పలు ప్రాంతాల్లో ప్రధాన రోడ్లు జలమయమయ్యాయి. దీంతో వాహనదారులు, సామాన్య ప్రజలు ఇబ్బందులు పడుతున్నారు.

జిల్లా వ్యాప్తంగా జరుగుతున్న ZPTC, MPTC ఎన్నికల పోలింగ్‌పై కూడా ఈ వర్షం ప్రభావం చూపింది. పోలింగ్ నిదానంగా సాగుతోంది. ఓటర్లు తమ ఓటు హక్కు వినియోగించుకునేందుకు పోలింగ్ కేంద్రాలకు చేరుకుంటున్నారు. అయితే వర్షం కారణంగా వారు ఇబ్బందులు ఎదుర్కొంటున్నారు.

నెల్లూరు నగరంలోని కొండాయిపాలెం గేటు సమీప జంక్షన్‌లో భారీగా వర్షపు నీరు చేరింది. ఈ ప్రాంతం జలాశయాన్ని తలపిస్తోంది. రోడ్లపై గుంతలు ఉండడంతో టూ వీలర్, ఫోర్ వీలర్ డ్రైవర్లు ఎక్కడ రోడ్డు, ఎక్కడ గుంత అని తెలియక ఇబ్బందులు పడుతున్నారు. రోడ్ల పరిస్థితిపై స్థానికులు అసంతృప్తి వ్యక్తం చేశారు.

నగరంలో దాదాపు మూడు రోజుల తర్వాత భారీ వర్షం కురిసింది. తుఫాను ప్రభావం అంతగా లేకపోయినా, ఈ వర్షంతో పలు ప్రాంతాలు నీట మునిగాయి.

అధికారులు ఎన్నికల విధులతో పాటు వర్ష పరిస్థితిని కూడా పర్యవేక్షిస్తున్నారు. చెరువులు, వాగులు, వంకల వద్ద రెవెన్యూ, పోలీసు సిబ్బందిని ఏర్పాటు చేశారు. నీటి పారుదల శాఖ అధికారులు చెరువుల వద్ద ఇసుక బస్తాలను సిద్ధంగా ఉంచారు. మరో కొన్ని గంటలు భారీ వర్షం కురిస్తే చెరువులు, వాగులు పొంగే అవకాశం ఉందని అధికారులు చెప్తున్నారు.