భీమ్‌గల్‌లో 100 పడకల ప్రభుత్వ ఆసుపత్రి నిర్మాణం అసంపూర్తి; స్థానికులు ఆవేదన

నిజామాబాద్ జిల్లా భీమగల్ మండలంలో 100 పడకల ప్రభుత్వ ఆసుపత్రి నిర్మాణం గత ప్రభుత్వ హయాంలో ప్రారంభమైంది. రూ.35 కోట్లతో చేపట్టిన ఈ ప్రాజెక్టు ఇప్పటికీ పూర్తికాలేదు. పెండింగ్ బిల్లుల కారణంగా గుత్తేదారు పనులు ఆపివేయడంతో నిర్మాణం నిలిచిపోయింది.

ఇటీవల రాష్ట్ర ప్రభుత్వం రూ.3 కోట్లు విడుదల చేయడంతో పనులు తిరిగి ప్రారంభమయ్యాయి. కానీ పూర్తి స్థాయి నిర్మాణం మాత్రం ఇంకా పూర్తికాలేదు.

స్థానికులు తెలిపిన వివరాల ప్రకారం, భీమగల్ పరిసరాల్లోని 25కి పైగా గ్రామాలు, గిరిజన తండాలు ఈ ఆసుపత్రి అందుబాటులోకి వస్తే లబ్ధి పొందుతాయి. ప్రస్తుతం ఈ ప్రాంతాల ప్రజలు ఎమర్జెన్సీ చికిత్స కోసం ఆర్మూర్ ఏరియా ఆసుపత్రి లేదా నిజామాబాద్ జేజేహెచ్ వరకు వెళ్లాల్సిన పరిస్థితి ఉంది. రోడ్డు సౌకర్యం లేని మారుమూల ప్రాంతాల నుండి రోగులను తీసుకెళ్లడం చాలా కష్టమవుతోందని వారు వాపోతున్నారు.

ఆసుపత్రి నిర్మాణం పూర్తయితే వైద్య సేవలు స్థానికంగానే లభ్యమవుతాయని, మారుమూల గ్రామాల ప్రజలకు ఎంతో ప్రయోజనకరంగా ఉంటుందని స్థానికులు ఆశాభావం వ్యక్తం చేస్తున్నారు. రాష్ట్ర ప్రభుత్వం సత్వర చర్యలు తీసుకొని పెండింగ్ పనులు పూర్తి చేయించాలని కోరుతున్నారు.