పూణే చిన్నారి అత్యాచార హత్య కేసు: భీమరావ్ కాంబ్లేకి మరణశిక్ష విధించిన కోర్టు

పూణే శివార్లలోని నర్సాపూర్‌లో మే 1న మూడేళ్ల బాలికపై అత్యాచారం చేసి హత్య చేసిన భీమరావ్ కాంబ్లే (65)కి పూణే ప్రత్యేక న్యాయస్థానం మరణశిక్ష విధించింది. నేరం జరిగిన 16 రోజుల్లో పోలీసులు చార్జ్‌షీట్ దాఖలు చేయగా, నెల రోజుల్లోనే కోర్టు తీర్పు వెలువడింది.

సీసీటీవీ ఫుటేజీలో నిందితుడు బాలికను తీసుకెళ్తున్న దృశ్యాలు రికార్డయ్యాయి. తీవ్ర గాయాలతో మృతదేహం లభ్యమైంది. ఈ ఘటనపై మహారాష్ట్ర వ్యాప్తంగా నిరసనలు చెలరేగాయి.

ప్రాసిక్యూషన్ 12 సుప్రీంకోర్టు తీర్పులను ఉటంకిస్తూ ఈ కేసు రేరెస్ట్ ఆఫ్ ది రేర్ వర్గానికి చెందుతుందని వాదించింది. న్యాయమూర్తి ఆ వాదనను అంగీకరిస్తూ నిందితుడి చర్య క్రూరత్వాన్ని, అమానుషత్వాన్ని కలిగి ఉండటంతో ఎలాంటి కనికరం చూపించాల్సిన అవసరం లేదని పేర్కొన్నారు. బాలిక గాయాల స్వరూపం నిందితుడి చర్య తీవ్రతను స్పష్టం చేస్తోందని అన్నారు.

మహారాష్ట్ర ముఖ్యమంత్రి దేవేంద్ర ఫడ్నవీస్ ఈ కేసును నేరుగా పర్యవేక్షించగా, ప్రభుత్వం కఠిన చర్యలు తీసుకోవాలని ఆదేశించింది. ఈ కేసులో అత్యంత వేగంగా విచారణ, తీర్పు నమోదైంది.