భోగాపురం అంతర్జాతీయ విమానాశ్రయం ఆగస్టు 1న ప్రధాని మోదీ చేతుల మీదుగా ప్రారంభం

ఆంధ్రప్రదేశ్ లోని భోగాపురం అంతర్జాతీయ విమానాశ్రయం ప్రారంభానికి సిద్ధమైంది.

ఈ విమానాశ్రయాన్ని అల్లూరి సీతారామరాజు అంతర్జాతీయ విమానాశ్రయంగా నామకరణం చేశారు. ఫ్లయింగ్ ఫిష్ డిజైన్‌తో నిర్మించిన ఈ భవనం గంటకు 270 కిలోమీటర్ల వేగంతో వీచే తుఫాన్లను కూడా తట్టుకునేలా రూపొందించబడింది. 2200 ఎకరాల్లో ₹4,500 కోట్ల వ్యయంతో దీని నిర్మాణం జరుగుతోంది. 3.8 కిలోమీటర్ల రన్వే, 28 విమానాలు పార్కింగ్ సౌకర్యం ఇక్కడ ఏర్పాటు చేశారు.

జాతీయ రహదారి 16 నుంచి కేవలం ఒక కిలోమీటర్ దూరంలో ఈ విమానాశ్రయం ఉంది. సమీపంలో నాలుగు నక్షత్ర హోటళ్లు, తాజ్ విమాన్ హోటల్ నిర్మాణం పూర్తయ్యాయి. మరో మూడు నక్షత్ర హోటల్ కూడా సిద్ధంగా ఉంది. విమానాశ్రయానికి అనుసంధానంగా వీఎంఆర్డీఏ ఏడు రహదారులు, 102 కిలోమీటర్ల సెమీ రింగ్ రోడ్డు నిర్మిస్తోంది.

ఏరో సిటీ, ఏరో ఎడ్యూ సిటీలను కూడా సమీపంలో నిర్మిస్తున్నారు. దీనివల్ల ఫార్మా, ఐటీ, డేటా రంగాలకు ప్రయోజనం చేకూరుతుంది. పర్యాటక, ఆతిథ్య రంగాలు కూడా అభివృద్ధి చెందుతాయి. మొదటి దశలో ఏడాదికి 60 లక్షల మంది ప్రయాణికులను నిర్వహించే సామర్థ్యం ఉండగా, భవిష్యత్తులో 40 మిలియన్లకు విస్తరించే అవకాశం ఉంది.

జీఎంఆర్ సంస్థ ఈ విమానాశ్రయ నిర్మాణ బాధ్యతలు నిర్వహిస్తోంది. అన్ని టెస్ట్ రన్లు పూర్తి చేసుకున్న ఈ విమానాశ్రయాన్ని ప్రధాని నరేంద్ర మోదీ ఆగస్టు 1న ప్రారంభించనున్నారు.