భువనగిరి కోటకు రూ.57 కోట్లతో రోప్‌వే, మూడు నెలల్లో పూర్తి

భువనగిరి కోటపై రోప్‌వే ప్రాజెక్టు పనులు వేగంగా సాగుతున్నాయి. యాదాద్రి జిల్లా భువనగిరి కొండపై ఉన్న ఈ కోటకు రూ.57 కోట్లతో రోప్‌వే నిర్మాణం జరుగుతోంది. ఈ ప్రాజెక్టు స్వదేశ్ దర్శన్ పథకంలో ఎంపికైంది.

ఈ కొండ 610 మీటర్ల ఎత్తు, 5 ఎకరాల విస్తీర్ణంలో ఉంది. సుమారు 1000 ఏండ్ల చరిత్ర ఉన్న ఈ కోట ప్రస్తుతం పర్యాటక కేంద్రంగా మారింది. ఇప్పటివరకు మెట్ల ద్వారా మాత్రమే కోటపైకి చేరుకోవాల్సి వచ్చేది. మెట్లు ఎక్కేందుకు గంట సమయం పట్టేది.

రోప్‌వే నిర్మాణంతో ఆరు నిమిషాల్లోనే కొండపైకి చేరుకోవచ్చు. మొత్తం 6 కేబుల్ కార్లు ఏర్పాటు చేస్తున్నారు. 3 కార్లు పైకి, 3 కిందికి నడుస్తాయి. ఒక్కో కారుకు 6 మంది చొప్పున ఒకేసారి 18 మంది పైకి వెళ్లవచ్చు. గంటకు 250 మంది ప్రయాణించవచ్చు.

ఈ ప్రాజెక్టు కోసం 5 ఎకరాల భూమి సేకరించారు. కేబుల్ కార్ స్టేషన్, పార్కింగ్, హోటళ్లు, రెస్టారెంట్లు, స్విమ్మింగ్ పూల్ వంటి సౌకర్యాలు కూడా నిర్మిస్తున్నారు. కోటకు కొత్త మెట్లు, ద్వారాల మరమ్మత్తు పనులు చేపట్టారు.

యాదాద్రి-భువనగిరి ఎమ్మెల్యే కుంభం అనిల్ కుమార్ మాట్లాడుతూ... '18 ఏళ్ల క్రితం నుంచి ఈ ప్రాజెక్టు కోసం ప్రయత్నాలు ప్రారంభించాం. ఈ కల నేడు నెరవేరబోతోంది. ఇక మూడు నెలల్లో పనులు పూర్తవుతాయి. ఈ రోప్‌వేతో భువనగిరి ఒక ముఖ్యమైన పర్యాటక గమ్యస్థానంగా మారుతుంది' అని అన్నారు.

ఈ ప్రాజెక్టు పూర్తయితే భువనగిరి, యాదాద్రి, వరంగల్, రామప్ప దేవాలయం వంటి పర్యాటక ప్రాంతాలకు అనుసంధానంగా మారుతుందని అధికారులు ఆశిస్తున్నారు.