బిహార్ పోలీస్ పరీక్ష అభ్యర్థుల నిరసన హింసగా మారింది; పాటలిపుత్ర స్టేషన్‌లో ఉద్రిక్తత

బిహార్ లోని పాటలిపుత్ర రైల్వే స్టేషన్‌లో పోలీస్ నియామక పరీక్ష రాసే అభ్యర్థులు పోలీసులతో ఘర్షణకు దిగారు. రైళ్లు సరిపడా లేకపోవడంతో ఆగ్రహించిన అభ్యర్థులు రైళ్లపై రాళ్లు రువ్వడంతో పరిస్థితి ఉద్రిక్తంగా మారింది.

బిహార్ రాష్ట్ర పోలీస్ బోర్డు నియామక పరీక్ష జరుగుతుండగా, తెల్లవారుజామునే పెద్ద సంఖ్యలో అభ్యర్థులు పరీక్షా కేంద్రాలకు వెళ్లేందుకు పాటలిపుత్ర స్టేషన్‌కు చేరుకున్నారు. సరిపడా రైళ్లు ఏర్పాటు కాకపోవడంతో ఆందోళనకు దిగి, స్టేషన్‌లోని ఫుడ్ స్టాల్స్‌పై దాడి చేశారు. అలాగే రైళ్లపై రాళ్లు రువ్వారు.

పరిస్థితిని అదుపు చేయడానికి రైల్వే పోలీస్ అధికారులు లాఠీచార్జి చేశారు. టియర్ గ్యాస్ ప్రయోగించి, గాలిలోకి హెచ్చరిక కాల్పులు జరిపారు. ఈ సంఘర్షణలో పలువురు పోలీసులకు గాయాలయ్యాయని సమాచారం.

అల్లర్ల కారణంగా కొంతసేపు పాటలిపుత్ర స్టేషన్‌లో రైళ్ల రాకపోకలు నిలిచిపోయాయి. తర్వాత అధికారులు పరిస్థితిని అదుపు చేసి, రైలు సర్వీసులను తిరిగి ప్రారంభించారు.