BJP మిషన్ తెలంగాణ: నితిన్ నవీన్ క్యాడర్‌కు పిలుపు

తెలంగాణలో BJP బలోపేతం చేసుకోవడానికి పార్టీ జాతీయ అధ్యక్షుడు నితిన్ నవీన్ మూడు రోజుల పాటు రాష్ట్రంలో పర్యటించారు. పార్టీ క్యాడర్‌కు స్పష్టమైన దిశా నిర్దేశం చేశారు. పశ్చిమ బెంగాల్ తరహా పోరాటాలకు సిద్ధం కావాలని కార్యకర్తలకు పిలుపునిచ్చారు.

రోడ్లపైకి వచ్చి ప్రజా సమస్యలపై పోరాటం చేస్తేనే BJP కి భవిష్యత్తు ఉంటుందని నితిన్ నవీన్ స్పష్టం చేశారు. అధికారంలోకి రావడానికి ఎటువంటి షార్ట్ కట్స్ లేవని, కష్టపడి పని చేయాల్సిందేనని సూచించారు. వ్యక్తివాదం మానేసి పార్టీ బలోపేతంపై దృష్టి సారించాలని కార్యకర్తలకు చెప్పారు.

ఆదిలాబాద్, ఆసిఫాబాద్, నిర్మల్, కామారెడ్డి, సిద్దిపేట, మెదక్, వనపర్తి, నాగర్కర్నూల్ జిల్లాల్లో నిర్మించిన పార్టీ కార్యాలయ భవనాలను నితిన్ నవీన్ వర్చువల్‌గా ప్రారంభించారు.

కాంగ్రెస్ తో పాటు ప్రాంతీయ పార్టీలు అవకాశవాద రాజకీయాలు చేస్తున్నాయని నితిన్ నవీన్ విమర్శించారు. BRS ప్రభుత్వ వైఫల్యాలపై BJP క్యాడర్ పోరాడిన ఫలితాన్ని కాంగ్రెస్ మోసపూరితంగా అనుభవించిందని ఆరోపించారు. డబుల్ ఇంజన్ సర్కార్ తోనే రాష్ట్ర అభివృద్ధి సాధ్యమవుతుందని పేర్కొన్నారు.

బెంగాల్‌లో అనేక పోరాటాల తర్వాత BJP బలపడినట్లే తెలంగాణలోనూ అదే పరిస్థితి పునరావృతం అవుతుందని నితిన్ నవీన్ విశ్వాసం వ్యక్తం చేశారు. మిషన్ తెలంగాణ ప్రారంభమైందని, రాబోయే అన్ని ఎన్నికల్లో BJP శ్రేణులు సమర్థవంతంగా పోరాడాలని పిలుపునిచ్చారు.