నూతన సంవత్సర కాల్పుల కేసు: బీజేపీ ఎమ్మెల్యేకు 4 ఏళ్ల జైలు శిక్ష

2018 డిసెంబర్ 31న నూతన సంవత్సర వేడుకల సందర్భంగా జరిగిన కాల్పుల్లో ఓ మహిళ మృతి చెందిన కేసులో బీహార్ బీజేపీ ఎమ్మెల్యే రాజ్ కుమార్ సింగ్‌కు ఢిల్లీ కోర్టు నాలుగేళ్ల జైలు శిక్ష విధించింది. ఢిల్లీలోని ప్రత్యేక న్యాయమూర్తి విశాల్ గోగ్నే ఈ తీర్పు వెలువరించారు.

సాహెబ్‌గంజ్ నియోజకవర్గం నుండి ప్రస్తుత ఎమ్మెల్యేగా ఉన్న రాజ్ కుమార్ సింగ్ (రాజీవ్ కుమార్ అని కూడా పిలుస్తారు), 2018 డిసెంబర్ 31 రాత్రి ఢిల్లీ శివార్లలోని ఫతేపూర్ బేరీ ప్రాంతంలోని తన వ్యవసాయ క్షేత్రంలో నూతన సంవత్సర వేడుకలు నిర్వహించారు. అర్ధరాత్రి సమయంలో ఆయన తన అధికారాన్ని ప్రదర్శిస్తూ కాల్పులు జరిపారు. ఈ కాల్పుల్లో ఆయన బంధువు అర్చన గుప్తా తీవ్రంగా గాయపడి మృతి చెందారు.

న్యాయమూర్తి తీర్పు సందర్భంగా మాట్లాడుతూ, చట్టబద్ధమైన పాలన కొనసాగే దేశంలో ‘సింగం’, ‘పుష్ప’ వంటి సినిమా పాత్రల అవసరం లేదని, అక్రమ ఆయుధాల వాడకాన్ని ప్రోత్సహించే తుపాకీ సంస్కృతి రాజకీయాల్లోకి బాహుబలులు ప్రవేశించేలా చేస్తుందని అభిప్రాయపడ్డారు. ప్రజా ప్రతినిధిగా ఉన్నంత మాత్రాన శిక్ష నుంచి మినహాయింపు ఇవ్వలేమని స్పష్టం చేశారు. బాధ్యతారాహిత్యంగా ప్రవర్తించిన ఈ చర్య తుపాకీ సంస్కృతిని ప్రోత్సహించిందని కోర్టు ఆక్షేపించింది.

మృతురాలి కుటుంబానికి రూ.25 లక్షలు పరిహారంగా చెల్లించాలని న్యాయమూర్తి ఆదేశించారు. 2018 ఘటనపై ఢిల్లీ పోలీసులు హత్య కేసుతో పాటు ఆయుధ చట్టం కింద చార్జిషీట్ దాఖలు చేశారు. ఈ తీర్పుపై ఎమ్మెల్యే తరఫు న్యాయవాదులు ఉన్నత న్యాయస్థానాన్ని ఆశ్రయించే అవకాశం ఉంది.