బోనాల ఉత్సవాలు జూలై 16న ప్రారంభం, రూ.20 కోట్లు కేటాయింపు

తెలంగాణలో బోనాల ఉత్సవాలు జూలై 16న ప్రారంభమవుతాయని మంత్రి కొండా సురేఖ ప్రకటించారు. ఈ ఏడాది బోనాల ఏర్పాట్ల కోసం ప్రభుత్వం రూ.20 కోట్లు కేటాయించింది.

ప్రతి ఏటా మాదిరిగానే గోల్కొండ కోటలోని మహంకాళి అమ్మవారి తొలి బోనంతో ఈ పండుగ ప్రారంభమవుతుందని మంత్రి తెలిపారు. భక్తులు ఇళ్ల నుంచి పవిత్రమైన బోనాలను తీసుకువచ్చి అమ్మవారి దర్శనం చేసుకుంటారని పేర్కొన్నారు.

హైదరాబాద్‌లోని ఎంసీఆర్ హెచ్ఆర్డీలో బోనాల ఉత్సవాలపై అధికారులతో సమన్వయ సమావేశం జరిగింది. ఈ సమావేశంలో మంత్రి కొండా సురేఖ లండన్ నుంచి వర్చువల్‌గా పాల్గొన్నారు. ఆషాఢ మాసంలో జరిగే బోనాల ఉత్సవం తెలంగాణ ప్రజలకు ప్రత్యేకమైనది.