కైలాస మానస సరోవర యాత్రికులకు కేంద్రం కీలక సూచనలు

52 మంది భారతీయ యాత్రికులు నేపాల్‌లో చిక్కుకుపోయిన నేపథ్యంలో, కేంద్ర ప్రభుత్వం కైలాస మానస సరోవర యాత్రకు వెళ్లే వారికి కీలక సూచనలు జారీ చేసింది. ప్రైవేట్ టూర్ ఆపరేటర్ల ద్వారా యాత్ర చేయాలనుకునే వారు అన్ని అధికారిక పత్రాలు, వీసాలు, పర్మిట్లు చేతికి వచ్చే వరకు ప్రయాణం ప్రారంభించొద్దని హెచ్చరించింది.

ప్రైవేట్ ఆపరేటర్లను నమ్మి సరైన డాక్యుమెంట్లు లేకుండా వెళ్లిన 52 మంది యాత్రికులు ఇటీవల నేపాల్‌లో చిక్కుకుపోయారు. వారు తమను రక్షించాలని అభ్యర్థించడంతో కేంద్రం స్పందించి ఈ సూచనలు విడుదల చేసింది.

ప్రభుత్వ సహాయ కమిటీల ద్వారా సాగే యాత్రలు సాఫీగా సాగుతున్నప్పటికీ, ప్రైవేట్ ఆపరేటర్ల నిర్లక్ష్యం వల్ల సాధారణ పౌరులు సరిహద్దుల దగ్గర ఇబ్బందులు పడుతున్నారు. యాత్రికులు తాము ఎంచుకునే టూర్ ఆపరేటర్‌కు అధికారిక గుర్తింపు, రిజిస్ట్రేషన్ ఉందో లేదో ముందుగా సరి చూసుకోవాలి. అనుమతులు లేకుండా వెళ్తే చట్టపరమైన సమస్యలు, ఆర్థిక నష్టాలు, మానసిక ఒత్తిడి ఎదురవుతాయని విదేశాంగ మంత్రిత్వ శాఖ హెచ్చరించింది.