10, 20 రూపాయల పాలిమర్ నోట్ల ప్రతిపాదనకు కేంద్రం ఆమోదం

10, 20 రూపాయల కాగితం నోట్ల స్థానంలో పాలిమర్ నోట్లను ప్రయోగాత్మకంగా ప్రవేశపెట్టాలన్న ఆర్బీఐ ప్రతిపాదనకు కేంద్రం ఆమోదం తెలిపింది. ఈ విషయాన్ని కేంద్ర ఆర్థిక మంత్రి నిర్మల సీతారామన్ రాజ్యసభలో తెలిపారు.

ఈ ప్రతిపాదనను ఆర్బీఐ సెంట్రల్ బోర్డు సిఫారసు చేసి కేంద్ర ప్రభుత్వానికి పంపింది. తొలి దశలో 200 కోట్ల పాలిమర్ నోట్లను ప్రయోగాత్మకంగా మార్కెట్‌లో ప్రవేశపెట్టాలని ఆర్బీఐ ప్రతిపాదించింది. విజయవంతమైతే వాటిని సాధారణ చలామణిలోకి తీసుకురావాలని సూచించింది.

పాలిమర్ నోట్లను ప్లాస్టిక్ వంటి పదార్థంతో తయారు చేస్తారు. కాగితపు నోట్ల కంటే ఇవి ఎక్కువ కాలం మన్నికగా ఉంటాయని ఆర్థిక నిపుణులు తెలిపారు. ప్రస్తుతం చలామణిలో ఉన్న కాగితం నోట్లతో పాటుగానే ఈ కొత్త నోట్లను జారీ చేస్తారని ప్రభుత్వం స్పష్టం చేసింది.

పాలిమర్ నోట్ల కొనుగోలు ప్రక్రియ ప్రాథమిక దశలో ఉందని నిర్మల సీతారామన్ తెలిపారు. నోట్లను ఎప్పుడు ప్రవేశపెడతారు, వాటి కోసం ఎంత ఖర్చు అవుతుంది అనే వివరాలను ఇప్పుడే చెప్పలేమని ఆమె అన్నారు.