దేశవ్యాప్తంగా రూ. 668 కోట్లతో 7 ఈఎస్ఐ ప్రాజెక్టులు ప్రారంభం

దేశవ్యాప్తంగా రూ. 668 కోట్ల వ్యయంతో ఏడు ఈఎస్ఐ ఆరోగ్య ప్రాజెక్టులను కేంద్ర ప్రభుత్వం ప్రారంభించింది. హైదరాబాద్ సనత్ నగర్ నుంచి వర్చువల్ విధానంలో కేంద్ర మంత్రి మన్సుక్ మాండవ్య ఈ ప్రాజెక్టులను ప్రారంభించారు.

అసోం, తమిళనాడు, ఆంధ్రప్రదేశ్, గుజరాత్, రాజస్థాన్ రాష్ట్రాల్లో ఈ ప్రాజెక్టులు చేపట్టారు. వీటిలో కొత్త ఆసుపత్రులు, డిస్పెన్సరీలు, కార్యాలయాలు భాగంగా ఉన్నాయి. సనత్ నగర్‌లో రూ. 211.13 కోట్ల వ్యయంతో 180 పడకల నూతన ఓపీడీ బ్లాక్‌ను నిర్మించారు. ఇందులో ఐసీయూ, ఎన్ఐసీయూ, యోగా, రేడియాలజీ వంటి సౌకర్యాలు అందుబాటులోకి వచ్చాయి.

గత పదేళ్లలో ఈఎస్ఐ లబ్ధిదారుల సంఖ్య రెట్టింపు అయ్యిందని మంత్రి మాండవ్య చెప్పారు. 29 పాత లేబర్ కోడ్లను రద్దు చేసి నాలుగు కొత్త లేబర్ కోడ్లు అమలు చేస్తున్నామని, ప్రమాదాలు లేదా దీర్ఘకాలిక వ్యాధుల బారిన పడే కార్మికులకు పూర్తి ఆర్థిక భరోసా కల్పించే సంస్కరణలు తీసుకొచ్చామని తెలిపారు.

విజయవాడ గుణదల ఈఎస్ఐ ప్రధాన ఆసుపత్రిని ఎంపీ కేసినేని చిన్ని సందర్శించారు. ఈ ఆసుపత్రి పరిధిలో దాదాపు 3 లక్షల మంది కార్డ్ హోల్డర్లు ఉన్నారని చెప్పారు. ఇటీవల కేంద్రం ఈఎస్ఐ అర్హత సాలరీ పరిమితిని రూ. 21,000 నుంచి రూ. 42,000కు పెంచడంతో లబ్ధిదారుల సంఖ్య మరింత పెరుగుతుందని అన్నారు. ప్రస్తుతం 155 పడకల ఆసుపత్రిని 300 పడకల సూపర్ స్పెషాలిటీ ఆసుపత్రిగా అప్‌గ్రేడ్ చేయాలని ఎంపీ డిమాండ్ చేశారు.