కైలాస మానస సరోవర్ యాత్ర: చైనా వీసా లేనిదే వెళ్లొద్దని కేంద్రం హెచ్చరిక

కైలాస మానస సరోవర్ యాత్రకు వెళ్ళే భారతీయ యాత్రికులకు కేంద్ర ప్రభుత్వం కీలక హెచ్చరిక జారీ చేసింది. చైనా వీసాలు, పర్మిట్లు లేకుండా ప్రయాణించవద్దని సూచించింది.

ప్రైవేట్ టూర్ ఆపరేటర్లను నమ్మి అవసరమైన పత్రాలు లేకుండా వెళ్ళిన 52 మంది భారతీయ యాత్రికులు ఇటీవల నేపాల్‌లో చిక్కుకున్న సంఘటన నేపథ్యంలో ఈ హెచ్చరిక చేసింది. వారు సహాయం కోసం విజ్ఞప్తి చేయడంతో కేంద్రం స్పందించింది.

యాత్రకు సంబంధించిన అన్ని అధికారిక పత్రాలు పూర్తిగా చేతికి వచ్చే వరకు ప్రయాణాన్ని ప్రారంభించవద్దని అనుమతి పత్రాలు లేకుండా వెళ్తే చట్టపరమైన సమస్యలు, ఆర్థిక నష్టం ఎదురయ్యే అవకాశం ఉందని హెచ్చరించింది.

ప్రైవేట్ ట్రావెల్స్ ఏజెన్సీల విషయంలో అప్రమత్తంగా ఉండాలని, గుర్తింపు పొందిన టూర్ ఆపరేటర్లను మాత్రమే ఎంచుకోవాలని సూచించింది. గుర్తింపు లేని ఆపరేటర్ల నిర్లక్ష్యం వల్ల విదేశాల్లో ఇబ్బందులు పడాల్సి వస్తుందని విదేశాంగ శాఖ తెలిపింది.