BLO విధులతో రెవెన్యూ సిబ్బంది బిజీ: ఎంఆర్ఓ ఆఫీసుల్లో సర్టిఫికెట్ల జారీ ఆలస్యం

ఎంఆర్ఓ, తహసీల్దార్ కార్యాలయాల్లో కుల, ఆదాయ, నివాస ధృవీకరణ పత్రాల జారీ ఆలస్యం అవుతోంది. ఓటర్ల జాబితా సవరణ ప్రక్రియ కోసం రెవెన్యూ సిబ్బందిని బూత్ లెవల్ ఆఫీసర్లుగా నియమించడమే ఇందుకు కారణం.

రాష్ట్ర ప్రభుత్వం ఓటర్ల జాబితా ప్రత్యేక సవరణ కార్యక్రమం చేపట్టడంతో, సబార్డినేట్ రెవెన్యూ సిబ్బంది అంతా బూత్ లెవల్ ఆఫీసర్లుగా విధులు నిర్వర్తిస్తున్నారు. దీంతో మీసేవ కేంద్రాల నుంచి తహసీల్దార్ లాగిన్లలో వచ్చి చేరిన లక్షకు పైగా సర్టిఫికెట్ దరఖాస్తులు పెండింగ్లో పడ్డాయి.

కొమరంభీం ఆసిఫాబాద్ జిల్లాలో 6,000 పైగా, నిజామాబాద్‌లో 6,453, ఆదిలాబాద్‌లో 750, జగిత్యాలలో 5,000, పెద్దపల్లిలో 4,433, యాదాద్రి జిల్లాలో 3,800, నాగర్‌కర్నూల్‌లో 319 దరఖాస్తులు పెండింగ్‌లో ఉన్నట్లు అధికారులు తెలిపారు.

ఇంటర్మీడియట్, డిగ్రీ, పీజీ, ఇంజనీరింగ్ కోర్సుల కౌన్సిలింగ్‌కు సర్టిఫికెట్లు తప్పనిసరి కావడంతో విద్యార్థులు ఇబ్బందులు పడుతున్నారు. కొన్ని ప్రైవేట్, కార్పొరేట్ కాలేజీలు సర్టిఫికెట్లు లేవని సీట్లు కేటాయించడం లేదని తల్లిదండ్రులు ఆరోపిస్తున్నారు.

రెవెన్యూ సిబ్బంది ఉదయం నుంచి సాయంత్రం వరకు BLO విధుల్లో బిజీగా ఉండటంతో, దరఖాస్తుల ఫీల్డ్ వెరిఫికేషన్ చేసేందుకు సమయం దొరకడం లేదు. స్థానిక విచారణ తప్పనిసరి అయిన కుల, ఆదాయ ధృవీకరణ పత్రాల జారీ ప్రక్రియ నిలిచిపోయింది. ఉన్నతాధికారుల ఒత్తిడి ఉన్నా ఫీల్డ్ నివేదిక లేకుండా డిజిటల్ సంతకాలు చేయలేమని తహసీల్దార్లు చెబుతున్నారు.

గ్రామీణ, పట్టణ ప్రాంతాల్లో ఒకే పరిస్థితి నెలకొనడంతో మీసేవ నిర్వాహకులు, దరఖాస్తుదారుల మధ్య రోజూ ఘర్షణలు జరుగుతున్నాయి. విద్యార్థులు, తల్లిదండ్రులు తహసీల్దార్ ఆఫీసుల చుట్టూ తిరుగుతున్నారు.