ఖమేని అంత్యక్రియల వేళ ఇరాన్‌లోని మష్హాద్ రైల్వేపై అమెరికా దాడి, 14 మంది మృతి

ఇరాన్ మాజీ సుప్రీం లీడర్ ఆయతుల్లా అలీ ఖమేని అంత్యక్రియలు జరుగుతున్న సమయంలో మష్హాద్ నగరాన్ని కలిపే రైల్వే వంతెనపై అమెరికా దాడి చేసింది. ఇరానియన్ రివల్యూషనరీ గార్డ్స్ (IRGC) ప్రకారం ఈ దాడిలో 14 మంది ప్రాణాలు కోల్పోయారు.

కాల్పుల విరమణ ఒప్పందం ముగిసిన తర్వాత అమెరికా ఇరాన్‌లో సుమారు 90 సైనిక లక్ష్యాలపై దాడి చేసింది. హార్ముజ్ జలసంధిలో వాణిజ్య నౌకలపై దాడులు చేసే ఇరాన్ సామర్థ్యాన్ని దెబ్బతీయడమే లక్ష్యమని అమెరికా రక్షణ శాఖ తెలిపింది. ఇరాన్ క్షిపణి, డ్రోన్ నిల్వ కేంద్రాలు, వైమానిక రక్షణ వ్యవస్థలను లక్ష్యంగా చేసుకున్నారు.

ఈ దాడులకు ప్రతిస్పందనగా ఇరాన్ కువైట్, బహ్రెయిన్‌లోని అమెరికా స్థావరాలపై డ్రోన్లు, క్షిపణులతో ఎదురుదాడి చేసింది. అయితే ఆ దాడులను బహ్రెయిన్, కువైట్ సైన్యాలు అడ్డుకున్నట్లు స్థానిక రక్షణ శాఖలు తెలిపాయి.

మష్హాద్‌లోని ఇమామ్ రజా దర్గా ప్రాంగణంలో ఖమేని అంత్యక్రియలు జరిగాయి. లక్షలాది మంది పాల్గొన్న ఈ కార్యక్రమానికి 21 దేశాల నుంచి 4,700 మంది ప్రతినిధులు హాజరయ్యారు. కొత్త సుప్రీం లీడర్ మొజ్తబా ఖమేని భద్రతా కారణాల రీత్యా తండ్రి అంతిమ సంస్కారాలకు హాజరుకాలేదని ఇరాన్ వర్గాలు తెలిపాయి.

రైల్వే మార్గం ధ్వంసం కావడంతో టెహరాన్-మష్హాద్ మధ్య రైళ్ల రాకపోకలు నిలిచిపోయాయి. అంత్యక్రియలకు ఆటంకం కలిగించే ఉద్దేశ్యంతోనే అమెరికా ఈ దాడి చేసిందని IRGC ఆరోపించింది. ఇరాన్‌పై మరిన్ని దాడులు జరిగితే ఈ ప్రాంతంలోని ఇతర అమెరికా స్థావరాలపై దాడులు విస్తరిస్తామని IRGC హెచ్చరించింది.