తాగి ఆర్టీసీ బస్సు నడిపిన వ్యక్తి; జనగామలో 20 కి.మీ ప్రయాణం

జనగామలో ఫుల్లుగా మద్యం సేవించిన వ్యక్తి ఖాళీగా ఉన్న ఆర్టీసీ బస్సును నడిపాడు. సూర్యపేట వైపు 20 కిలోమీటర్లు బస్సు నడిపిన ఆ వ్యక్తి చివరకు సింగరాజుపల్లి టోల్ గేట్ వద్ద బస్సుపై నియంత్రణ కోల్పోయి సిమెంట్ దిమ్మెను ఢీకొట్టాడు.

వెంకన్న అనే వ్యక్తి తిరుపతికి వెళ్ళేందుకు రైల్వే స్టేషన్‌కు వెళ్లగా రైలు దొరకలేదు. రాత్రి పూట జనగామ బస్ స్టాండ్‌కు చేరుకున్న అతను అక్కడ ఖాళీగా ఉన్న ఆర్టీసీ బస్సును చూశాడు. పడుకోవాలని బస్సు ఎక్కిన వెంకన్నకు ఇగ్నిషన్ తాళాలు కనిపించడంతో బస్సు స్టార్ట్ చేశాడు. బస్ స్టాండ్‌లో రెండు రౌండ్లు తిప్పినా ఆర్టీసీ సిబ్బంది గమనించలేదు.

ట్రాక్టర్ నడిపే అనుభవం ఉన్న వెంకన్నకు బస్సు నడపడం తేలికగా అనిపించింది. దాంతో అతను బస్సు తీసుకుని సూర్యపేట వైపు వెళ్లిపోయాడు. దాదాపు 20 కిలోమీటర్లు ప్రయాణించాక దేవరుపల్లి మండలం సింగరాజుపల్లి టోల్‌గేట్ సమీపంలో బస్సు అదుపు తప్పింది. ఫలితంగా రోడ్డు పక్కన ఉన్న సిమెంట్ దిమ్మెను ఢీకొట్టాడు.

ఈ సమయంలో ఆ మార్గంలో వేరే బస్సులు లేవు, బస్సులో ప్రయాణికులు కూడా లేరు. టోల్ సిబ్బంది వెంటనే వెంకన్నను ఆపి విచారించగా, అతను మద్యం సేవించినట్లు గుర్తించారు. పోలీసులకు సమాచారం ఇవ్వడంతో వెంకన్నను అరెస్ట్ చేసి కేసు నమోదు చేశారు. ఈ ఘటనపై ఆర్టీసీ అధికారులు స్పందించాల్సి ఉంది.