ఏపీ సీఎం చంద్రబాబు ఈరోజు బనగానపల్లెలో పర్యటన; 'మీ భూమి మీ హక్కు' కార్యక్రమంలో పాల్గొంటారు

ఆంధ్రప్రదేశ్ ముఖ్యమంత్రి నారా చంద్రబాబు నాయుడు ఈరోజు కర్నూలు జిల్లా బనగానపల్లెలో పర్యటించనున్నారు. తహసీల్దార్ కార్యాలయంలో ప్రజలకు అందుతున్న సేవలపై ఆయన నేరుగా సమీక్షించనున్నారు. అలాగే రైతులు, స్థానికులతో ముఖాముఖీగా మాట్లాడతారు.

మీ భూమి మీ హక్కు కార్యక్రమంలో ముఖ్యమంత్రి పాల్గొని, భూరికార్డుల రీసర్వే ప్రగతిని పరిశీలించనున్నారు. ఇప్పటివరకు రాష్ట్రంలోని 6,887 గ్రామాల్లో భూముల రీసర్వే పూర్తయింది. ప్రభుత్వం 29.04 లక్షల మంది పట్టాదారులకు పాస్‌పుస్తకాలు పంపిణీ చేసింది.

'మీ భూమి మీ హక్కు' రీసర్వే ప్రక్రియ ద్వారా భూ వివాదాలను తగ్గించి, భూమి రికార్డులను పారదర్శకంగా మార్చాలన్నది ప్రభుత్వ లక్ష్యం. నేటి పర్యటనలో మండలంలోని సేవలు, పథకాల అమలుపై సీఎం స్థానిక అధికారులతో చర్చించే అవకాశం ఉంది.