అమరావతి బ్యాంక్ స్ట్రీట్ నిర్మాణం వేగంగా పూర్తి చేయాలని సీఎం చంద్రబాబు ఆదేశం

ఆంధ్రప్రదేశ్ ముఖ్యమంత్రి చంద్రబాబు నాయుడు అమరావతి రాజధాని ప్రాంతంలో బ్యాంక్ స్ట్రీట్ నిర్మాణ పనులు వేగంగా పూర్తి చేయాలని సీఆర్‌డీఏ అధికారులను ఆదేశించారు. బ్యాంకుల ప్రధాన కార్యాలయాల నిర్మాణ అనుమతుల విషయంలో ఎలాంటి జాప్యం చేయవద్దని స్పష్టం చేశారు.

సీఆర్డీఏ అథారిటీ సమావేశంలో ఫైనాన్షియల్ డిస్ట్రిక్ట్‌పై చర్చించారు. ఇప్పటివరకు 13 బ్యాంకుల్లో 11 సంస్థలు తమ నిర్మాణ బాధ్యతను కేంద్ర శాఖ సీపీడబ్ల్యూడీకి అప్పగించాయని అధికారులు తెలిపారు. సమన్వయం చేసుకుని నిర్మాణాలు త్వరగా పూర్తి చేయాలని సీఎం సూచించారు.

రాజధానిలో ఫోన్, కేబుల్, ఇంటర్నెట్ కనెక్టివిటీ సమస్యలు రాకుండా చూడాలని, అమరావతిని నివాసయోగ్యంగా తీర్చిదిద్ది జీవన వ్యయం తగ్గించేందుకు చర్యలు తీసుకోవాలని ఆదేశించారు. ప్రకాశం బ్యారేజీకి ఎగువన వైకుంఠపురం వరకు సంవత్సరం పొడవునా నీళ్లు నిలవ ఉండేలా ప్రణాళికలు సిద్ధం చేయాలన్నారు.

పరిశుభ్రత, కాలుష్య నివారణపై దృష్టి పెట్టామని, స్వర్ణాంధ్ర స్వచ్ఛాంధ్ర కార్యక్రమంలో భాగంగా ప్రతి నెల మూడో శనివారం పారిశుద్ధ్యంపై ప్రజల్లో అవగాహన కల్పిస్తున్నట్లు సీఎం తెలిపారు. నెట్ జీరో, సర్క్యులర్ ఎకానమీ లక్ష్యాల కోసం ప్రభుత్వ కార్యాలయాలు, స్కూళ్లు, అంగన్‌వాడీ కేంద్రాల్లో ప్రత్యేక శ్రద్ధ తీసుకుంటున్నామన్నారు.

ఇండక్షన్ స్టవ్‌ల పంపిణీని వేగవంతం చేయాలని సీఎం ఆదేశించారు. మొదటి దశలో పట్టణ ప్రాంతాల్లో 11,400 ఇండక్షన్ స్టవ్‌లు పంపిణీ చేశామని, ఈ నెలాఖరులోగా మిగతా 44,346 అంగన్‌వాడీ కేంద్రాలకు పంపిణీ పూర్తి చేయాలని సూచించారు. ఒక్కో స్టవ్‌పై నెలకు ₹247 ఆదా అవుతుందని చెప్పారు.

వేస్ట్ టు ఎనర్జీ ప్లాంట్లు, ఈ-ఆటోలు, స్వీపింగ్ మిషన్లు, ఎస్టీపీ ప్లాంట్లు వంటి ప్రాజెక్టులను కాలపరిమితిలో పూర్తి చేయాలని నిర్దేశించారు. ఈ సమావేశంలో కృష్ణ కరకట్ట నిర్మాణం, పార్కింగ్ కాంప్లెక్స్, జ్యూడీషియల్ అకాడమీ నిర్మాణం వంటి ప్రాజెక్టులకు ఆమోదం తెలిపారు.