జూలై 1 నుంచి సీఎం చంద్రబాబు ఐదు రోజుల జిల్లాల పర్యటన

ఆంధ్రప్రదేశ్ ముఖ్యమంత్రి చంద్రబాబు నాయుడు జూలై 1 నుంచి 5 వరకు జిల్లాల పర్యటన చేపట్టనున్నారు. ఈ ఐదు రోజుల్లో ఆయన నెల్లూరు, తిరుపతి, కడప, చిత్తూరు జిల్లాల్లో పలు అభివృద్ధి కార్యక్రమాల్లో పాల్గొంటారు.

జూలై 1న నెల్లూరు జిల్లా చిల్లకూరు మండలంలో పేదల సేవా కార్యక్రమంలో ముఖ్యమంత్రి పాల్గొంటారు. అదే రోజు తిరుపతి జిల్లా శ్రీ సిటీలో హీరో మోటోకార్ప్ సంస్థ రూ.750 కోట్ల పెట్టుబడితో ఏర్పాటు చేస్తున్న గ్లోబల్ పార్ట్స్ సెంటర్‌కు శంకుస్థాపన చేస్తారు. రాత్రి అక్కడే బస చేస్తారు.

జూలై 2న ఉదయం రైల్వే కోడూరులో ఎబీజీ రామజీ ప్రారంభోత్సవ కార్యక్రమంలో చంద్రబాబు నాయుడు పాల్గొననున్నారు. అనంతరం తిరుపతిలో జరిగే జీఎస్‌డీపీ కెపాసిటీ బిల్డింగ్ వర్క్‌షాప్‌కు ఆయన హాజరవుతారు. ఈ వర్క్‌షాప్‌లో నీతి ఆయోగ సభ్యులు, ప్రధాని ఆర్థిక సలహా మండలి సభ్యులు కూడా పాల్గొంటారు.

జూలై 3న కడప జిల్లాలో రాయలసీమ స్టీల్ ప్లాంట్ పనులకు ముఖ్యమంత్రి శ్రీకారం చుడతారు. జమ్మలమడుగు నియోజకవర్గంలోని సున్నపురాళ్లపల్లెలో ఈ స్టీల్ ప్లాంట్ నిర్మాణం చేపట్టనున్నారు. అనంతరం చిత్తూరు జిల్లా కుప్పం చేరుకుని జూలై 5 వరకు అక్కడే ఉండి పలు అభివృద్ధి కార్యక్రమాలు, శంకుస్థాపనలు, ప్రారంభోత్సవాలు నిర్వహిస్తారు. జూలై 5న అమరావతికి తిరిగి చేరుకుంటారు.